Islandiyada harakatga kelgan vulqon sabab aholi evakuatsiya qilinmoqda

Islandiya janubi-g‘arbidagi Reykyanes yarimorolida joylashgan Sundhnukur vulqoni yana faollashdi, deb xabar beradi The Guardian.

Qayd etilishicha, 1 aprel kuni ertalab Sundhnukur kraterida faollik boshlangan. Lava va tutun chiqayotgan yoriq shaharning shimolidagi hududlarga yetib borgan, bu esa ogohlantiruvchi sirenalar ishga tushishiga sabab bo‘lgan. Mahalliy vaqt bilan soat 10:00 ga kelib, yoriqning uzunligi 700 metrga yetgan.

Blue Lagoon kurorti barcha turistlar evakuatsiya qilinganini bildirdi. Hozircha u yopiqligicha qolmoqda.

Grindavikda 2023 yil ma’lumotlariga ko‘ra, 3,8 ming kishi istiqomat qilgan, ammo vulqon harakatga kelganidan keyin ularning aksariyati ko‘chib ketgan. Qolganlarni esa politsiya evakuatsiya qilishga chaqirgan, chunki vulqon oldingiga nisbatan kuchliroq otilishi mumkin.

Ta’kidlanishicha, Sundhnukur vulqoni 2021 yildan beri 11 marta otilgan. Islandiyada 33 ta faol vulqon tizimlari mavjud. Reykyanes yarimorolida 2021 yil martda, 2022 yil avgustda, 2023 yil iyulda, shuningdek, 2024 yilning yanvar, mart, may, avgust va noyabr oylarida bir necha bor vulqon otilishlari kuzatilgan.

Avvalroq Havayida 2024 yil oxirlarida harakatga kelgan Kilauea vulqonining otilishi davom etayotgani to‘g‘risida xabar berilgandi. Uning yangi faollik fazasi 25 mart kuni boshlangan va ertasi kuniyoq vulqon lavalari 200 metrdan ortiq balandlikka otilgan.