Toshkent tumanida bir-biriga tutash ikki binoda yong‘in chiqdi

Hodisa oqibatida ushbu hududda bo‘lgan uchta Damas yonib zararlangan.

Toshkent viloyati Favqulodda vaziyatlar boshqarmasi Toshkent tumanida sodir bo‘lgan yong‘in yuzasidan ma’lumot berdi.

Qayd etilishicha, 4 aprel kuni soat 18:20 da Toshkent viloyati FVB Tezkor boshqaruv markaziga Toshkent tumani Farovon MFY, Ulug‘bek ko‘chasidagi bir-biriga tutash qurilgan ikkita binoda yong‘in sodir bo‘layotgani haqida xabar kelib tushgan.

Xabarga asosan, yong‘in o‘chirish ekipajlari hodisa joyiga soat 18:28 da yetib borgan, alanga soat 18:38 da o‘rab olingan va 19:03 da to‘liq o‘chirilgan.

Yong‘in oqibatida binolarning jami 145 metr kvadrat maydoni va ushbu hududda foydalanishga yaroqsiz bo‘lgan, nosoz holatdagi uchta Damas yonib zararlangan. Qutqaruvchilarning sa’y-harakatlari natijasida binolarning jami 700 metr kvadrat maydoni saqlab qolingan.

«Hodisa oqibatida tan jarohat olgan va halok bo‘lganlar yo‘q. Hozirda yong‘inning kelib chiqish sababi va zarari aniqlanmoqda», — deyiladi xabarda.

Avvalroq Namangan viloyati Davlatobod tumanidagi metan zapravkada Damas yonib ketgani to‘g‘risida xabar berilgandi.

#yong‘in #Damas #Toshkent tumani