Kislovodskda o‘zbekistonliklar Hayit bayrami munosabati bilan tadbir uyushtirishdi

Rossiyaning Kislovodsk hududida, bahavo va mineral manbalarga boy maskanda vatanning bir qismi — “O‘zbekiston” sanatoriysi joylashgan. Bu sog‘lomlashtirish maskanini tom ma'noda xorijdagi mitti O‘zbekiston, deb atash mumkin.

Hozirgi kunda bu yerda O‘zbekistonning turli hududlaridan kelgan 200 nafarga yaqin kishi o‘z salomatligini tiklayapti. Bu yerga odatda turli kasb egalari, turli yosh vakillari kelishadi.

Yaqinda sanatoriy ma'muriyati bu yerda Ramazon hayiti munosabati bilan bayram tadbiri uyushtirdi. Dasturxonga o‘zbek milliy taomlari — palov, lag‘mon, bo‘g‘irsoq tortildi.

Bayram tadbirida O‘zbekistonda xizmat ko‘rsatgan artist, sohir ovoz sohibi Xojiakbar Hamidov ishtirokida xayriya konserti tashkil etilgani, ayniqsa, bayramga o‘zgacha shukuh bag‘ishladi. Xofizning “Munojot”, “Muhabbat”, “Umr o‘tmoqda” singari o‘lmas qo‘shiqlari yangradi. Toshkentdan keltirilgan tor va doirada, jonli ovozda ijro etilgan kuy-qo‘shiqlar  bir muddatga hordiq chiqaruvchilarning ona Vatan sog‘inchini bosdi. Ayniqsa, sanatoriyning katta yosh vakillari konsertni maroq bilan tinglashdi.

“O‘zbekiston” sanatoriysi 1932 yilda tashkil etilgan bo‘lib, tibbiy minerallarga boy Kislovodsk shahrida joylashgan 44 ta sanatoriy orasida eng yaxshilaridan biri sanaladi. U yurak-qon tomir, nafas organlari, asab tizimidagi kasalliklarni davolashga ixtisoslashgan.  

Sh. SULTONOV,
mehnat faxriysi