Moskvadagi o‘zbek diasporasi qotil enaganing jinoyatini millati bilan bog‘lamaslikni iltimos qildi

Moskvadagi O‘zbek milliy-madaniy avtonomiyasi kengashi raisi Xabib Abdullayev Moskvada 4 yoshli qizchani o‘ldirgan o‘zbekistonlik ayolning millatiga urg‘u bermaslikni iltimos qildi. Abdullayev bu haqda "Govorit Moskva" radiostansiyasiga bergan intervyusida aytdi.

"Fikrimcha, bu yerda millat – ikkilamchidir, bu qandaydir aqldan ozish bo‘lgan. Biz bundan larzaga keldik. Bu yerda gap millatda emas, balki bunday ishlarga qodir bo‘lgan odamning shuursizligidadir. Muhojirlar jinoyatlar, jumladan kutilmagan jinoyatlar sodir etishi – bu, albatta, hamma biladigan faktdir", deb ta'kidlab o‘tdi Abdullayev. Uning aytishicha, bunday jinoyatlar o‘zbeklar orasida juda kam yuz beradi.

Eslatib o‘tamiz, 29 fevralda Moskvadagi "Oktyabrskoye Pole" metro stansiyasi yonida o‘zbekistonlik Gulchehra Boboqulova kichik yoshli bolaning qotilligida gumon qilinib qo‘lga olingan. Xijob o‘rab olgan qotil qo‘lida tanasidan judo qilingan bolaning boshini ushlab turgan va o‘zini portlatishi bilan tahdid qilgan.

Ayol shu kuni avvalroq o‘zi enaga bo‘lib ishlagan oilaning uyidagi 4 yoshli qizchasini o‘ldirib, uning boshini tanasidan judo qilib, jinoyatni amalga oshirgan uyga o‘t qo‘ygan. Ushbu qotillik yuzasidan jinoiy ish qo‘zg‘atildi. Guvohlarning aytishicha, ayol bolaning boshi bilan birga metro oldida 20 daqiqaga yaqin yurgan.

Moskvadagi qotil-enaga tergovda o‘z jinoyati sababini aytdi