Rossiyaga Pokistondan migrantlar olib kirish uchun to‘g‘ridan-to‘g‘ri reyslar yo‘lga qo‘yiladi

«Biz bu borada muzokaralar olib boryapmiz. Bizda aloqalar bo‘ldi. Biz ularning pozitsiyasini eshitdik va Pokistonga imkoniyatlar mavjudligi haqida ma’lumot yetkazdik. Chunki avval Moskva va Karachi o‘rtasida reys bor edi. Shu bois, u yerda bu reyslarni qayta tiklashdan mamnun bo‘lishardi», — dedi u. Shu bilan birga, yo‘lovchi oqimi oshsa, boshqa yo‘nalishlar ham ehtimoldan xoli emas — barchasi ularning rentabelligiga bog‘liq bo‘ladi, deb qo‘shimcha qildi Jamoli.

Elchining so‘zlariga ko‘ra, shuningdek, Pokiston Rossiyadan fuqarolari uchun vizalar rejimini yumshatishini kutmoqda, «shunda ko‘proq odam kela oladi». 2023 yil dekabrida Rossiya TIV rasmiy vakili Mariya Zaxarova Rossiya hukumatining mazkur masalani faqat ikki davlat o‘rtasidagi readmissiya (deportatsiya qilingan fuqarolarni qayta qabul qilish majburiyati) bo‘yicha hukumatlararo kelishuv imzolangandan so‘ng ko‘rib chiqishga tayyorligini bildirgan edi.

Bundan oldin Rossiyadagi ishchi kuchi tanqisligi sharoitida mahalliy biznes Pokiston fuqarolarini MDHdan keladigan mehnat migrantlarining o‘rnini bosuvchi sifatida ko‘rib chiqayotgani xabar qilingan. Ularni qishloq xo‘jaligi va sanoat korxonalarida ishga jalb qilish rejalashtirilgan. Gap «malakali bo‘lmagan ishchilar — qadaqlovchilar, idish to‘plovchilar, ishlab chiqarish liniyalari operatorlari» haqida ketmoqda, deb ma’lum qilgan Ventra Industrial rekruting kompaniyasi direktori Olga Tonkix.

O‘z navbatida, Sverdlovsk oblasti mehnat va bandlik departamenti direktori Dmitriy Antonov hudud Pokiston, Hindiston, Bangladesh va Shri-Lankadan elektromontajchi, metallurg va qurilishchilarni jalb etish yuzasidan muzokaralar olib borayotganini bildirgan.

Moskva hukumati huzuridagi millatlar ishlari bo‘yicha kengashning migratsiya masalalari bo‘yicha komissiyasi rahbari Yuriy Moskovskiyning ta’kidlashicha, Pokiston fuqarolari «Alabuga» sanoat klasterga allaqachon olib kelinayotgan ekan. BMT ma’lumotlariga ko‘ra, Pokiston dunyodagi eng yirik migratsiya mamlakatlaridan biri hisoblanadi va o‘tgan yili 1,6 million kishi mamlakatni tark etgan.

Bungacha Rossiya Transport vazirligi Pokiston bilan aviaqatnovlarni tiklash masalasida ushbu mamlakat javobini kutayotganini ma’lum qilgan edi. Shu bilan birga, vazirlik Rossiya reyslarining iqtisodiy jihatdan zararsizligini ta’minlaydigan barqaror yo‘lovchi oqimi hali shakllanmaganini tan oldi. Pokiston Respublikasi energetika vaziri Avays Legariy esa mamlakatlar o‘rtasida to‘g‘ridan-to‘g‘ri reyslar 2025 yilda yo‘lga qo‘yilishi mumkinligini aytgan.

World Population Review ma’lumotlariga ko‘ra, xavfsizlik darajasi bo‘yicha Pokiston 139-o‘rinni egallaydi. Respublikadagi asosiy muammolardan biri — teraktlardir. Amerika tahlil markazi Stratfor 2019 yilda Rossiya aholisi qisqarayotgani, Pokiston va Afg‘onistonda esa aholi soni keskin o‘sib borayotganini hisobga olgan holda, Rossiya ushbu mamlakatlar fuqarolari uchun tobora jozibador bo‘lib borishi mumkinligini bashorat qilgan edi. Markaz tahlilchilari fikricha, rossiyaliklarni Pokiston va Afg‘onistondan kelgan migrantlar bilan to‘qnashuvlar kutmoqda, chunki mentalitetlar farqi katta.