Tramp Ukrainada sulhdan umid uzdi va Rossiyaga qarshi yangi sanksiyalar tayyorlamoqda

Shu munosabat bilan Oq uy Moskva va Kiyevga bosim o‘tkazishning yangi mexanizmlarini ishlab chiqmoqda.

Fox News telekanali jurnalisti Jyeki Haynrix ma’lum qilishicha, Tramp Vladimir Putindan norozi va Rossiya prezidenti muzokara jarayonini qasddan cho‘zayapti, deb hisoblaydi. Haynrixning ma’lumotlariga ko‘ra, Oq uy Rossiyaning neft eksportga qo‘yilgan cheklovlarni chetlab o‘tishiga yordam berayotgan «xufyona floti»ga nisbatan qattiq sanksiyalar joriy etish imkoniyatini ko‘rib chiqmoqda.

Reuters manbalari ham bu ma’lumotlarni tasdiqlamoqda: Vashingtonda Kreml AQSh bosimiga qattiq qarshilik ko‘rsatayotgani va murosaga bormaslikda davom etayotgani tan olinmoqda. Shu munosabat bilan AQSh hukumati Rossiyani o‘z pozitsiyasini qayta ko‘rib chiqishga majburlash uchun qanday iqtisodiy yoki diplomatik choralar ko‘rish mumkinligini muhokama qilmoqda, deb yozadi agentlik.

Shu bilan birga, Reuters manbalari ta’kidlashicha, Oq uyda tinch yo‘l bilan hal etish bo‘yicha ehtimoliy ssenariylardan hech biri endi mutlaqo real deb qaralmayapti. Bu Vashingtonning xavotirlarini kuchaytirmoqda — uch yildan ziyod davom etayotgan urush noma’lum muddatga cho‘zilishi mumkin, Ukraina esa G‘arbdan yanada ko‘proq harbiy va moliyaviy yordamga muhtoj bo‘ladi.

1 aprel kuni jurnalistlar oldida chiqish qilgan Oq uy matbuot kotibasi Kerolayn Levittning ta’kidlashicha, Tramp ham Putin, ham Zelenskiydan umidini uzgan. «Prezident bu mojaro imkon qadar tezroq yakunlanishini istaydi. Har ikki tomonda odamlar halok bo‘layapti va urush juda cho‘zilib ketdi. Bizning jamoa Rossiya va Ukraina tomonlari bilan hamkorlikni davom ettirmoqda», — dedi Levitt.

30 mart kuni Tramp Putin Zelenskiyning siyosiy legitimligini shubha ostiga olganidan qattiq norozi ekanini bildirdi va agar Moskva tinchlik kelishuviga rozi bo‘lmasa, Rossiya nefti eksportiga 25 foizli ikkinchi darajali bojlar joriy qilish bilan tahdid qildi.

Saylovoldi kampaniyasi davomida Tramp Ukrainadagi mojaroni 24 soat ichida tugatishga va’da bergandi, ammo Oq uyga qaytgandan so‘ng ushbu muddatlar sezilarli darajada uzaytirildi. 2025 yil fevralida Financial Times nashri G‘arb va Ukraina amaldorlariga tayanib, Tramp va Putin o‘t ochishni to‘xtatish imkoniyatini Pasxa (bu yil 20 aprelga to‘g‘ri keladi) yoki 9 may arafasida ko‘rib chiqayotganini ma’lum qilgandi.