«Ehtimol, men investitsiyalarni ko‘paytirishda juda faol bo‘ldim va janob Putinga bu yoqmadi», deb hazil qildi Rheinmetall yirik harbiy-sanoat konserni direktorlar kengashi raisi Armin Papperger DW'ning unga nisbatan Kreml buyrug‘i bilan amalga oshirilgan suiqasdga urinish sabablari haqidagi savoliga javoban.

«Ammo, - deya qo‘shimcha qildi Papperger, - agar men yo‘q bo‘lganimda, konsernni shunchaki yangi odam boshqarar edi va hech narsa o‘zgarmas edi».

Rossiya diversiyalari tahdidi

Joriy yilning yanvar oyi oxirida NATO bosh kotibi yordamchisi o‘rinbosari Jyeyms Appaturay Rossiya Armin Pappergerni o‘ldirishni rejalashtirganini rasman tasdiqladi. Appaturayning aytishicha, AQSh va Germaniya razvedka xizmatlari tomonidan to‘xtatilgan bu fitna Rossiyaning Yevropa bo‘ylab mudofaa sanoati rahbarlarini o‘ldirish rejalarining bir qismi bo‘lgan.

Nemis razvedka idoralari ma’lumotlariga ko‘ra, Germaniya harbiy-sanoat kompleksi korxonalarining o‘zi ham xavf ostida. Germaniya Konstitutsiyani himoya qilish federal idorasi rahbari Tomas Xaldenvangning so‘zlariga ko‘ra, Rossiya «eng shafqatsiz vositalar bilan urush olib borishga tayyor va diversiyadan foydalanmoqchi». Federal jinoiy politsiya boshqarmasi, shuningdek, nemis kompaniyalarini Rossiya manfaatlari va uning buyrug‘i bilan sodir etilishi mumkin bo‘lgan qo‘poruvchilik harakatlari haqida ogohlantirmoqda.

Germaniyaning 155 millimetrli artilleriya snaryadlarini eng yirik va muvaffaqiyatli ishlab chiqaruvchi Rheinmetall Pappergerga suiqasddan oldin Ukrainada zirhli mashinalar zavodini ochayotganini e’lon qilgan va bu Kremlda «chuqur xavotir»ga sabab bo‘lgan, deydi razvedka ma’lumotlaridan xabardor manbalardan biri.