Rossiya prezidenti Vladimir Putin 2024 yil mart oyida Rossiya armiyasi va harbiy razvedkasining yuqori martabali amaldorlari bilan yopiq uchrashuvda Germaniyaning Rheinmetall mudofaa konserni bosh direktori Armin Pappergerning ismini to‘rt marta tilga oldi va uni «provokator» va «Ukrainaga harbiy yuklar yetkazib berish bo‘yicha kurator» deb atadi. Bu uchrashuv, Focus Online'ning 7 fevral, juma kuni G‘arb razvedka idoralari ma’lumotlariga tayanib xabar berishicha, Rheinmetall kompaniyasi Ukraina rasmiylari talabiga binoan Ukraina g‘arbida o‘q-dorilar va tanklarni ta’mirlash ustaxonasini ishlab chiqaradigan qo‘shma korxona qurishi e’lon qilinganidan ko‘p o‘tmay sodir bo‘ldi.

Rossiya harbiy amaldorlari, jumladan, bir qancha generallar Putinga G‘arbning Ukrainaga qurol yetkazib berishi «to‘g‘ridan to‘g‘ri provokatsiya» ekanligini va Kiyevga har qanday moddiy-texnik ta’minot nafaqat armiya, balki xavfsizlik xizmatlarining ham sa’y-harakatlari bilan to‘xtatilishi kerakligini aytdi. Shundan so‘ng Putin nutq so‘zladi, uning mazmuni «G‘arb razvedkasi»ga uning agentlaridan biri yig‘ilish ishtirokchilari orasida bo‘lgani yoki idoraviy elektron yozishmalarga kirishga muvaffaq bo‘lgani uchun ma’lum bo‘ldi, deb yozadi Focus Online.

Bu nutqida Putin Armin Pappergerning ismini to‘rt marta tilga olib, uni «provokator» va «Ukrainaga harbiy yuklar yetkazib berish kuratori» deb atagan. Germaniya Konstitutsiyani himoya qilish federal idorasining yuqori martabali xodimi Focus Online muxbiri bilan suhbatda Putinning so‘zlari «g‘ayrioddiy ravishda qattiq» eshitilgani va nemis rasmiylarida jiddiy xavotir uyg‘otganini tushuntirdi.

Rheinmetall rahbari: Zavodlarimiz atrofida HHM tizimlari yo‘q

Germaniyaning Rheinmetall mudofaa konserni rahbari Armin Papperger Rossiyaning qo‘poruvchilik tahdidi tufayli o‘z korxonalarida ko‘rilgan xavfsizlik choralari haqida gapirdi.

«Ehtimol, men investitsiyalarni ko‘paytirishda juda faol bo‘ldim va janob Putinga bu yoqmadi», deb hazil qildi Rheinmetall yirik harbiy-sanoat konserni direktorlar kengashi raisi Armin Papperger DW'ning unga nisbatan Kreml buyrug‘i bilan amalga oshirilgan suiqasdga urinish sabablari haqidagi savoliga javoban.

«Ammo, - deya qo‘shimcha qildi Papperger, - agar men yo‘q bo‘lganimda, konsernni shunchaki yangi odam boshqarar edi va hech narsa o‘zgarmas edi».