Buyuk Britaniyada zudlik bilan 120 mingta zirhli nimcha chaqirib olinadi

Buyuk Britaniya Mudofaa vazirligi britaniyalik harbiy xizmatchilar tomonidan foydalanib kelingan ECBA turidagi 120 mingta zirhli nimcha zudlik bilan qaytarib olinishini e’lon qildi. Tekshiruvlar ushbu zirhli nimchalar plastinalarida mikroyoriqlarni aniqlagan.

The Guardian’ning yozishicha, 2023 yilda 120 mingta zirhli nimcha yaroqlilik muddati tugagani bois almashtirilishi kerak bo‘lgan. Ammo oldingi hukumat mablag‘larni tejash maqsadida almashtirish jarayonlarini to‘rt yilga kechiktirgan.

Leyboristlar hukumati vakillari harbiylarga nisbatan «bunday qaltislikka toqat qilmasliklarini» bildirgan. ECBA zirhli nimchalari ko‘krak va orqa qismida kichik himoya plastinaga ega bo‘lib, 30 yildan ko‘proq vaqt oldin foydalanishga qabul qilingan. Plastinalarining o‘lchami himoyani cheklagani bois u Iroq va Afg‘onistondagi harbiylar orasida ommalashmagan.

Ta’kidlanishicha, hozirda ushbu zirhli nimchalardan qo‘riqlash bo‘linmalari, Harbiy-dengiz kuchlari, dengiz piyodalarining harbiy xizmatchilari foydalanib keladi.

Ekspertlarning hisoblashicha, shu kabi zirhli nimchalarning har o‘ntadan bittasining plastinasida mikroyoriqlar mavjud. Endi zirhli plastinalar tekshiruvdan o‘tkaziladi, talabga javob bermaydiganlari almashtiriladi. Mamlakat Mudofaa vazirligi bu qo‘shimcha xarajatlar tug‘dirmasligiga umid qilmoqda.