Kolumbiya prezidenti Gustavo Petro AQShdan deportatsiya qilingan noqonuniy muhojirlarni olib ketayotgan ikki Amerika harbiy samolyotiga qo‘nishni rad etganidan so‘ng, prezident samolyotini AQShdan kolumbiyalik muhojirlarning qaytishi uchun tayyorladi. Bu haqda 26 yanvar, yakshanba kuni X ijtimoiy tarmog‘ida davlat rahbari devoni vakillari ma’lum qildi.

Kolumbiya ma’muriyati ma’lumotlariga ko‘ra, Petro migratsiya inqirozini hal qilish uchun Lotin Amerikasi va Karib havzasi davlatlari hamjamiyatining (CELAC) yig‘ilishini ham chaqirgan.

Navbatdan tashqari yig‘ilish 30 yanvar kuni bo‘lib o‘tadi, dedi CELAC'da raislik qilayotgan Honduras rahbari Xiomara Kastro.

Kolumbiya yetakchisi Trampga: sizning blokadangiz meni qo‘rqitmaydi

Bundan tashqari, Petro Kolumbiya sanoat va savdo vaziri Luis Karlos Reyes Ernandesga Qo‘shma Shtatlardan import qilinadigan tovarlar bo‘yicha tariflarni 25 foizga oshirish zarurligi haqida ma’lum qildi, deya xabar beradi dpa.

«Sizning blokadangiz meni qo‘rqitmaydi», dedi Gustavo Petro AQSh prezidenti Donald Trampga.

Amerika yetakchisi avvalroq Kolumbiyadan keladigan barcha tovarlarga 25 foizlik boj joriy etish, Kolumbiya rasmiylariga kirishni taqiqlash va bu davlatning barcha fuqarolari uchun chegara nazoratini kuchaytirishni buyurgan edi.

Bir hafta ichida qo‘shimcha tariflar 50 foizga ko‘tarilishi kerak, deya qo‘shimcha qildi Tramp.