Kolumbiya AQShdan deportatsiya qilingan migrantlarni o‘z samolyotlarida va kishansiz qaytardi

AQSh hududidan deportatsiya qilingan kolumbiyalik noqonuniy migrantlar o‘z vataniga qaytdi. Kolumbiya ularni olib kelish uchun ikkita harbiy transport samolyotidan foydalandi, deb xabar berdi BBC.

Kolumbiya prezidenti Gustavo Petro migrantlarni qutladi va ular kishansiz keltirilgani, bu bilan ularga munosib muomala qilinganini ta’kidladi. «Ular o‘z vatanida, ularni bu yerda sevadilar», deb yozdi u ijtimoiy tarmoqda.

26 yanvar kuni Amerikaning ikkita harbiy transport samolyoti Kaliforniyadan Kolumbiyaga noqonuniy migrantlarni olib kelishi kerak edi. AQSh kolumbiyaliklarni muntazam ravishda deportatsiya qiladi, masalan, 2024 yilda Bayden ma’muriyati davrida 124 ta samolyot noqonuniy migrantlarni Kolumbiyaga yetkazgan.

Ammo, bu safar Kolumbiya prezidenti Gustavo Petro samolyotlarni ortga qaytardi. U o‘z mamlakati fuqarolariga jinoyatchidek munosabatda bo‘lish noto‘g‘ri ekanini va «kolumbiyalik migrantlar jinoyatchi emasligini, qo‘li kishanlangan holda qaytarilishiga hech qachon yo‘l qo‘ymasligini» aytdi. Petro migrantlar parvoz paytida qo‘l-oyog‘i kishanlangani tasvirlangan videoni ko‘rsatdi.

Bunga javoban AQSh prezidenti Donald Tramp Kolumbiyaning barcha tovarlariga 25 foizlik boj, bundan tashqari, Kolumbiya hukumati a’zolariga viza cheklovlari joriy qilinishini aytdi. Gustavo Petro ham qarab turmadi va Kolumbiya xuddi shunday javob qaytarishini, Amerika tovarlariga boj tariflarini oshirish bo‘yicha ko‘rsatma berganini aytdi.

Biroq, 26 yanvar kuni kechki payt Oq uy Kolumbiya barcha talablarga rozi bo‘lganini e’lon qildi va Kolumbiya tashqi ishlar vaziri Luis Gilberto Murilo mamlakatlar «boshi berk ko‘chadan» chiqish yo‘lini topganini aytdi.

AQSh ham, Kolumbiya ham vaziyatni hal qilishga yordam bergan murosa tafsilotlarini oshkor qilmadi.