Oyatullohning maslahatchisi: Eronning G‘azodagi mojaroga aralashuvi Eron-AQSh urushiga olib keladi

Eronlik nufuzli siyosatchi, Siyosiy maqsadga muvofiqlikni aniqlash kengashi a’zosi G‘ulom-Ali Haddod-Adel Tehronni Isroil va HAMAS guruhi o‘rtasidagi urushda bevosita ishtirok etishi oqibatlari haqida ogohlantirdi. Bu haqda Eronning «Etemad» gazetasi 18 noyabr kuni xabar berdi. «Eronda G‘azoda urush boshlamoqchi bo‘lganlar shuni bilishi kerakki, Isroil aynan shu narsani xohlayapti», - deya Haddod-Adel so‘zlarini keltiradi dpa. 

Uning fikricha, Tehronning mojaroda bevosita ishtirok etishi Eron va AQSh o‘rtasidagi urushga olib keladi. «Bu holda Isroil xavfsiz zonada qoladi», deb ta’kidladi siyosatchi. 

Dpa ta’kidlashicha, Haddod-Adel mamlakatning o‘ta konservativ fraksiyasiga mansub va Eron oliy yetakchisi oyatulloh Ali Xomanaiyning yaqin ishonchli vakili hisoblanadi. Bu, dpa aniqlik kiritganidek, Haddod-Adel, Konstitutsiyaga ko‘ra, barcha strategik masalalar bo‘yicha yakuniy so‘zni aytadigan Xomanaiy pozitsiyasini bildirayotganini anglatishi mumkin. 

Siyosiy maqsadga muvofiqlik kengashi Eronda parlament va hukumat o‘rtasidagi qonunchilik kelishmovchiliklarini hal qilishda vositachilik qiluvchi muhim siyosiy organ hisoblanadi. 

AQSh Eronni G‘azodagi mojaroga aralashmaslik haqida ogohlantirdi 

Qo‘shma Shtatlar Eronni Isroil va Eron faol qo‘llab-quvvatlayotgan HAMAS guruhi o‘rtasidagi urushga aralashmaslik haqida bir necha bor ogohlantirgan. Noyabr oyi boshida AQSh davlat kotibi Entoni Blinken Amerika harbiy kemalari O‘rta Yer dengizida joylashtirilganini eslatdi. «Biz bu mojaroning yanada kuchayishiga yo‘l qo‘ymaslik uchun hamma narsani qilishimiz kerak», - dedi Amerika Davlat departamenti rahbari. 

Shu bilan birga, Blinken Eron va «Hizbulloh» Isroilga qarshi ikkinchi front ochsa, AQSh to‘g‘ridan to‘g‘ri mojaroga aralashadimi yoki yo‘qmi, bunga aniqlik kiritmadi, ammo Amerika Qo‘shma Shtatlar mavjud ekan, Isroil yolg‘iz qolmasligini bildirdi. 

Reuters avvalroq oyatulloh Ali Xomanaiy noyabr oyi boshida HAMAS vakillari bilan uchrashuv chog‘ida Tehron Isroil bilan urushga kirishmasligini, chunki Eron 7 oktyabr kuni sodir bo‘lgan hujum haqida ogohlantirilmaganini aytgani haqida xabar bergan edi. 

Isroil-Falastin mojarosi

7 oktyabr kuni ertalab HAMASning harbiy qanoti - «Izzaddin al-Qassam brigadalari» Isroilga qarshi «Al-Aqso to‘foni» operatsiyasi boshlanganini e’lon qildi. G‘azo sektoridan Isroil tomon minglab raketalar otildi, qurolli guruhlar Isroil aholi punktlariga kirdi.

HAMASning bildirishicha, operatsiya bosib olingan Sharqiy Quddusdagi Al-Aqso masjidiga bostirib kirish va isroillik muhojirlarning falastinliklarga nisbatan zo‘ravonligi kuchayib borayotganiga javoban amalga oshirilgan.

Bunga javoban Isroil armiyasi G‘azo sektorida HAMASga qarshi o‘nlab qiruvchi samolyotlardan foydalangan holda «Temir qilichlar» operatsiyasi boshlanganini e’lon qildi. 

Isroil-Falastin mojarosi avj olgandan beri 12 mingdan ortiq falastinlik halok bo‘ldi. Isroilda qurbonlar soni 1400 dan oshadi. G‘azoning 2,3 million aholisi Isroilning havodan ommaviy bombardimon qilishi va eksklavning to‘liq blokadasi tufayli oziq-ovqat, suv va dori-darmonlar tanqisligidan aziyat chekmoqda.