Peru terma jamoasi yarimhimoyachisi Renato Tapiya kolumbiyaliklar bilan durang natija haqida kelishuv bo‘lganini tan oldi.

Ma'lumki, JCh-2018 saralashidan o‘rin olgan Peru - Kolumbiya o‘yini 1:1 hisobida yakunlanib, mezbonlar qit'alararo pley-off bosqichiga yo‘l olgan, mehmonlar esa jahon chempionati yo‘llanmasini qo‘lga kiritgandi.

«So‘nggi 5 daqiqa ichida kolumbiyaliklar bizga murojaat qilishdi. Ular boshqa stadionlardagi natijalardan xabardor edi va o‘yin biz xohlagandek yakunlandi.

Falkao bilan o‘zim gaplashdim va u durang natijani ushlab tursak, ikkala jamoa ham keyingi bosqichga chiqishini aytdi» , – dedi Tapiya Marca nashriga bergan intervyusida.

Avvalroq, bu o‘yinning 76-daqiqasida hisob tenglashgach, Kolumbiya terma jamoasi yetakchisi Radamel Falkao peruliklardan hujum qilmaslikni so‘ragani, chunki bu natija har ikkala terma jamoani qoniqtirishini aytgani haqida xabarlar berilgan edi. Natijada, Chili terma jamoasi JCh-2018 yo‘llanmasidan quruq qoldi.