Трамп Украинада сулҳдан умид узди ва Россияга қарши янги санкциялар тайёрламоқда

Шу муносабат билан Оқ уй Москва ва Киевга босим ўтказишнинг янги механизмларини ишлаб чиқмоқда.

Fox News телеканали журналисти Жеки Ҳайнрих маълум қилишича, Трамп Владимир Путиндан норози ва Россия президенти музокара жараёнини қасддан чўзаяпти, деб ҳисоблайди. Ҳайнрихнинг маълумотларига кўра, Оқ уй Россиянинг нефт экспортга қўйилган чекловларни четлаб ўтишига ёрдам бераётган «хуфёна флоти»га нисбатан қаттиқ санкциялар жорий этиш имкониятини кўриб чиқмоқда.

Reuters манбалари ҳам бу маълумотларни тасдиқламоқда: Вашингтонда Кремл АҚШ босимига қаттиқ қаршилик кўрсатаётгани ва муросага бормасликда давом этаётгани тан олинмоқда. Шу муносабат билан АҚШ ҳукумати Россияни ўз позициясини қайта кўриб чиқишга мажбурлаш учун қандай иқтисодий ёки дипломатик чоралар кўриш мумкинлигини муҳокама қилмоқда, деб ёзади агентлик.

Шу билан бирга, Reuters манбалари таъкидлашича, Оқ уйда тинч йўл билан ҳал этиш бўйича эҳтимолий сценарийлардан ҳеч бири энди мутлақо реал деб қаралмаяпти. Бу Вашингтоннинг хавотирларини кучайтирмоқда — уч йилдан зиёд давом этаётган уруш номаълум муддатга чўзилиши мумкин, Украина эса Ғарбдан янада кўпроқ ҳарбий ва молиявий ёрдамга муҳтож бўлади.

1 апрель куни журналистлар олдида чиқиш қилган Оқ уй матбуот котибаси Кэролайн Левиттнинг таъкидлашича, Трамп ҳам Путин, ҳам Зеленскийдан умидини узган. «Президент бу можаро имкон қадар тезроқ якунланишини истайди. Ҳар икки томонда одамлар ҳалок бўлаяпти ва уруш жуда чўзилиб кетди. Бизнинг жамоа Россия ва Украина томонлари билан ҳамкорликни давом эттирмоқда», — деди Левитт.

30 март куни Трамп Путин Зеленскийнинг сиёсий легитимлигини шубҳа остига олганидан қаттиқ норози эканини билдирди ва агар Москва тинчлик келишувига рози бўлмаса, Россия нефти экспортига 25 фоизли иккинчи даражали божлар жорий қилиш билан таҳдид қилди.

Сайловолди кампанияси давомида Трамп Украинадаги можарони 24 соат ичида тугатишга ваъда берганди, аммо Оқ уйга қайтгандан сўнг ушбу муддатлар сезиларли даражада узайтирилди. 2025 йил февралида Financial Times нашри Ғарб ва Украина амалдорларига таяниб, Трамп ва Путин ўт очишни тўхтатиш имкониятини Пасха (бу йил 20 апрелга тўғри келади) ёки 9 май арафасида кўриб чиқаётганини маълум қилганди.