Трамп TikTokʼнинг АҚШдаги фаолиятини яна 75 кунга узайтиришини маълум қилди

Доналд Трамп TikTok ижтимоий тармоғининг АҚШдаги фаолиятини яна 75 кунга узайтириш имконини берувчи фармонни имзолаганини эълон қилди.

АҚШ президентининг сўзларига кўра, унинг маъмурияти «TikTokʼни қутқариш бўйича битим устида тинмай ишлаяпти», аммо бунинг учун «яна озгина тер тўкиш» талаб этилади ва шу боисдан у ижтимоий тармоқ фаолиятини узайтиришга оид фармонни имзолаган.

«Биз Хитой билан виждонан ҳамкорликни давом эттириш умидидамиз. Тушунишимча, улар ўзаро божларимиздан унчалик мамнун эмас… Бу божлар — энг кучли иқтисодий восита эканини ва миллий хавфсилигимиз учун ниҳоятда муҳимлигини исботлайди! Биз TikTokʼнинг «сояга кетишини» хоҳламаймиз. TikTok ва Хитой билан ҳамкорлик қилиб, келишувга эришишни интиқлик билан кутяпмиз», — деб ёзади Трамп TruthSocial ижтимоий тармоғидаги саҳифасига.

TikTokʼка эгалик қилувчи ByteDance компанияси ижтимоий тармоқнинг Америка бўлинмасини сотиши учун қўйилган сўнгги муддат 5 апрелда якунланиши керак эди.

2024 йил баҳорда АҚШ вакиллар палатаси TikTok Хитойнинг ByteDance компаниясидан ажратилмаса, мамлакатда ушбу ижтимоий тармоқни тақиқлаш имконини берадиган қонунни маъқуллаган эди. Конгрессменларнинг ҳисоблашича, TikTok миллий хавфсизликка таҳдид уйғотади, чунки Хитой ҳукумати ByteDance’ни илованинг америкалик фойдаланувчиларига оид маълумотларни беришга мажбурлаши мумкин. Апрел ойида ҳужжат АҚШ президенти Жо Байден томонидан имзоланган, январ ойида, Трамп инаугурациясидан олдин эса АҚШ Олий суди мазкур қонунни қўллаб-қувватлаган эди.

20 январ куни ўтказилган инаугурациядан кейин Трамп АҚШ бош прокурорига қонуннинг кучга киришини 75 кунга кечиктиришни буюрди. У TikTok ўз акцияларининг 50 фоизини Америка компанияларига топширса, АҚШ ҳудудидаги фаолиятини давом эттириши мумкинлигини маълум қилган эди.