Битта машинада нуқсон топилса, бренднинг ҳамма моделларини ёппасига тақиқлаш тўғрими?

Хитойнинг Leapmotor бренди остидаги автомобилларни Ўзбекистонга олиб кириш тақиқлангани жамоатчилик фаоллари танқидига сабаб бўлмоқда.

Ўзбекистонда Хитойнинг Leapmotor бренди остидаги енгил автомобилларни сертификатлаш учун аризалар қабули тўхтатилди. Бунга шу брендга тегишли С16 автомобилида аниқланган камчилик сабаб сифатида келтириляпти.

Техник жиҳатдан тартибга солиш соҳасида назорат инспекциясининг маълум қилишича, мазкур транспорт воситасида ҳосил бўладиган электромагнит шовқин даражаси рухсат этилган чегарадан 16 баробар юқори экан.

Жамоатчилик вакиллари бу ҳаракатни маҳаллий ишлаб чиқарувчилар учун бозорни тозалашга уриниш деб баҳолаяпти

«Мошинбай чеклов русумбай тақиққа айланди»

Иқтисодчи Отабек Бакиров Leapmotor’га нисбатан киритилган тақиқ маҳаллий компанияларнинг автомобили сотилмай қолгани билан боғлиқ бўлиши мумкинлигига эътибор қаратди.

«Мана, баҳона ҳам тайёр: битта мошин моделида «камчилик» аниқлаб, бутун бир русумдаги автомобиллар импорти тақиқланяпти. Бизнинг-ча, бу ҳам етарли бўлмаса керак», дея ёзди иқтисодчи.

«Битта модел учун бутун брендни тақиқлаш»

Autodeklarant канали муаллифи ҳам битта моделда қандайдир «камчилик» топиб, бутун бир бренднинг импортини чеклаш мумкинлигидан ажабланяпти.

«Техник жиҳатдан тартибга солиш агентлигига: бир бренднинг айнан битта моделида қандайдир «камчилик» аниқлаб, бутун бир бренд импортини чекладинглар.

Нега унда битта моделнинг текширув натижаларини барча ушбу турдаги моделларга татбиқ қилмасдан, ҳаммасини бирма-бир халқни қийнаб текшириб юрибсизлар ўзи?» деб ёзади канал муаллифи.

«Европада сотилаётган автомобилларнинг камчилигини Ўзбекистонда аниқладик»

Блогер Умид Ғофуров қарийб 30 йилдан бери Ўзбекистонда ишлаб чиқарилаётган Damas автомобилида ҳеч қандай камчилик топилмай, Европа бозорига ҳам кириб борган Leapmotor’дан нуқсон чиққанидан ҳайратга тушган.

«Энди Ўзбекистонга Leapmotor олиб келиш мумкин эмас, сабаби камчилиги бор экан. Қаранг-а, бутун дунёда тан олинган бренд. Инвесторлари ичида казо-казо компаниялар бор. Европада расман сотиляпти, лекин камчиликлари бор экан. Буни биз Ўзбекистонда аниқлабмиз.

Эслатиб ўтаман, Ўзбекистонда 30 йилдан бери Damas автомобили ишлаб чиқарилади. Мана шу Damasʼда камчилик йўқ, ҳар қандай стандартларга жавоб беради. Лекин Leapmotor С16 жавоб бермайди. Кулайми ёки йиғлайми? Мана шу полигонлар етмаган-да? Мен ҳам борганман ўша полигонга. Машинани олиб бордим ва қани нима қиларкан деб қизиқдим. Машинани икки ёки уч дақиқа қарашди. Энг қизиғи, мен киришим мумкин эмас, яъни ҳайдовчи киритилмайди, ичкарида нима бўлаётганини кўрмайди», деди у.

Умид Ғофуров ҳам Leapmotor билан бўлаётган ҳолатни мамлакатдаги рақобат муҳитини ёмонлаштиришга қилинаётган уриниш сифатида баҳолади.

«Тасодифни қарангки, бу компанияга рақобатчи компания Ўзбекистонда расман фаолият олиб боряпти. Улар завод қуряпти, дейишяпти. Энди билмадим, қачон қурилади завод, унгача Хитойдан тайёр машина олиб келяпти. Ҳеч қандай утилизация солиғи тўламаяпти. Нархлар ошиши уларга таъсир ҳам қилмайди. Мана, энди бозорини озгина-озгина чақиб олган Leapmotor камчиликка эга бўлиб чиқди. Менга қизиқ, кейинги компания қайси, яъни қайси компанияда камчиликлар аниқланади?» дейди у.