Трамп Россия нефтига иккиламчи божлар жорий этиш билан таҳдид қилди 

АҚШ президенти Доналд Трамп, агар Москва Украинада ўт очишни тўхтатишга тўсқинлик қилса, барча Россия нефтига иккинчи даражали божлар киритишга ваъда берди. «Агар биз Россия билан Украинадаги қон тўкилишини тўхтатиш бўйича келишувга эриша олмасак ва бу Россиянинг айби деб ўйласам — мен Россиядан келадиган барча нефтга иккиламчи божлар киритаман», деди Трамп 30 март, якшанба куни NBC News телеканалига берган интервюсида.

Унинг сўзларига кўра, гап 25-50 фоизлик божлар ҳақида кетяпти, улар исталган вақтда жорий этилиши мумкин ҳамда ўт очишни тўхтатиш келишуви тузилмаса, бир ой ичида кучга киради. «Бу агар сиз Россиядан нефт сотиб олсангиз, АҚШда бизнес юрита олмайсиз, дегани», деб тушунтирди Трамп.

Америка етакчиси, шунингдек, Россия президенти Владимир Путин украиналик ҳамкасби Володимир Зеленскийнинг қонунийлигига шубҳа қилганида «жуда ғазабланган»лигини айтди. Шу билан бирга, Трамп Украинадаги вазиятдан норози бўлишига қарамай, Россия президенти билан «жуда яхши муносабатда» эканини ва «у тўғри иш қилса, ғазаб тезда тарқаб кетишини» таъкидлади.

Шу муносабат билан АҚШ президенти келгуси ҳафтада Путин билан янги телефон мулоқоти ўтказилишини маълум қилди. Кремл ҳозирча бундай суҳбат тайёрланаётганини тасдиқламади ва Трампнинг сўзларига изоҳ бермади.