Россияда тарқалаётган «номаълум вирус» микоплазма пневмонияси бўлиб чиқди

Россияда тарқалаётган ва «номаълум» деб тавсифланган вирус микоплазма пневмонияси бўлиб чиқди. Бу ҳақда «Роспотребнадзор» хабар берди.

Ташкилотнинг таъкидлашича, тарқалган хабарларда вирус «янги» деб аталмаган, фақат «номаълум» (чунки у аниқланмаган) деб аталган. Бу «микоплазма пневмонияси» бўлиши мумкинлиги тахмин қилинди ва бу тез орада тасдиқланди.

Шу билан бирга, «Роспотребнадзор» вазият қаттиқ назоратга олинганини таъкидлади. Шунингдек, Россияда респираторли инфекциялар бўйича, шу жумладан ўткир респиратор вирусли инфекциялар, грипп, Covid-19 ва пневмония бўйича эпидемиологик вазият барқарор ва тўлиқ назорат остида эканлигини қўшимча қилди.

29 март куни маҳаллий Telegram каналлар Россияда номаълум вирус пайдо бўлгани ҳақида хабар берди. Маълумотларига кўра, беморлар юқори иситма ва кучли йўталдан шикоят қилган, Covid-19 ва грипп тестлари манфий чиққан.

Микоплазма пневмонияси - Мycoplasma pneumoniae томонидан қўзғатиладиган ўпка атипик инфекцияси. Касаллик кучли ва узоқ давом этадиган йўтал билан кечади. Бунда ҳарорат кўтарилиши, кўкрак қафасидаги оғриқлар кузатилиши, бронхиал обструкция ривожланиши мумкин. Ташхисни тасдиқлаш учун ПЗР тестини ўтказиш тавсия этилади. Микоплазма пневмонияси одатда камдан-кам ҳолларда жуда оғир кечади. Ушбу инфекцияга қарши вакцина йўқ.