Qoraqalpog‘istonda mashina gaz quvurga urilib, unga shikast yetkazdi

Qoraqalpog‘iston Respublikasi Xo‘jayli tumanida avtomobil gaz quvuriga urilgan va unga shikast yetkazgan. Bu haqda “Hududgazta’minot” AJ xabar bermoqda.

Ma’lum qilinishicha, hodisa 2025 yil 18 yanvar kuni tunda sodir bo‘lgan. Xo‘jayli tumanidagi o‘rta bosimli gaz quvuriga avtomobilning urilishi tufayli gaz sizib chiqish holati kuzatilgan.

Oqibatda tumanning “Madaniyat”, “Saboq” va “Mustaqillik” MFYlaridagi 2500 ta aholi xonadonida gaz ta’minoti vaqtincha to‘xtatilgan.

“Tuman gaz ta’minoti bo‘limi avariya brigadasi tomonidan ta’mirlash ishlari olib borilmoqda. Ta’mirlash ishlari yakunlangandan so‘ng gaz ta’minoti bosqichma-bosqich qayta tiklanadi”, deyiladi xabarda.

Energetika vazirligining xabar berishicha, nosozlik bartaraf etilgan va iste’molchilarga gaz ta’minoti qayta tiklangan.