BMT: Rossiyada ukrainalik asirlarning 95 foizi qiynoqqa solingan

Deyarli barcha ukrainalik harbiy asirlar - 95 foizi - Rossiyada qiynoqqa solinmoqda, dedi BMTning Kiyevdagi Inson huquqlari monitoringi missiyasi rahbari Daniel Bell NOS niderland telekanaliga bergan intervyusida.

«Ularni metall tayoq va dubinkalar bilan kaltaklashadi, elektr toki bilan qiynoqqa solishadi. BMT nomidan asirlar bilan muloqot qilishda 20 yil davomida ko‘rgan eng yomon narsam. Qiynoqlar keng tarqalgan va tizimli», - deydi Bell. U ukrainalik askarlarni qiynoqqa solish birinchi so‘roqdan boshlanishini ta’kidladi.

BMT vakilining aytishicha, u ukrainalik mahbuslar bilan suhbatlar natijalari asosida shunday xulosaga kelgan. 

Rossiya va Ukrainadagi asirlar

Rossiya prezidenti Vladimir Putinning so‘zlariga ko‘ra, iyun oyi boshida Rossiyada qariyb olti yarim ming ukrainalik asir bo‘lgan, 1400 ga yaqin rossiyalik esa Ukrainada asirlikda. Putin ma’lumot manbasini aytmadi. Urush sharoitida ma’lumotlarning to‘g‘riligini mustaqil ravishda tasdiqlash mumkin emas.

O‘z navbatida, Ukraina mart oyi boshida Ukraina asirligida ikki ming rus bo‘lganini da’vo qilmoqda. Kiyev, shuningdek, Moskvani ukrainalik harbiylarni qatl etishda ayblaydi. Ukraina Bosh prokuraturasiga ko‘ra, urush boshlanganidan beri taslim bo‘lgan 110 dan ortiq ukrainalik qatl etilgan. Rossiya harbiy asirlarga nisbatan shafqatsizlik ayblovlarini rad etadi.

Jyeneva konvensiyalari urishayotgan tomonlarni asirlarning normal sharoitda saqlash, ularga nisbatan shafqatsiz munosabatda bo‘lishni taqiqlash, asirlar qarindoshlari bilan aloqa qilishini ta’minlash va ularga xalqaro gumanitar tashkilotlarga murojaat qilish imkoniyatini berishga majbur qiladi.