Европа Иттифоқи Киевга «ёмон келишув»дан воз кечиш имконини бермоқчи

Европа Иттифоқининг устувор вазифаси Украинанинг куч билан тинчликка эришиши учун Россия агрессиясига қарши курашда Киевни қўллаб-қувватлашни кучайтиришдан иборат. Бу ҳақда 21 феврал, жума куни Брюсселда бўлиб ўтган брифингда ЕИнинг юқори мартабали амалдори маълум қилди. «Биз Украинани мустаҳкамлашимиз, шу орқали унга ёмон келишувдан воз кечиш имкониятини беришимиз керак», деди ЕИ вакили.

У ҳозирда тинчлик келишуви йўқлигини таъкидлади ва Европа Иттифоқи Украина президенти Володимир Зеленскийнинг позициясига тўлиқ қўшилишини ҳамда Киев ва Брюссел иштирокисиз тинчлик музокараларини қабул қилмаслигига ишонтирди. «Куч орқали тинчликка эришиш учун биз тезроқ ҳаракат қилишимиз, кўпроқ ҳаракат қилишимиз ва бирдамлик кўрсатишимиз керак», деди расмий.

Украинага ҳарбий ёрдамни ошириш

Шу мақсадда Европа Иттифоқининг ташқи ишлар бўйича олий вакили Кая Каллас янги ташаббус – Европа Иттифоқининг Украинага ҳарбий ёрдами кенгайтирилишини эълон қилади. Ташаббус 24 февралда, Россиянинг Украинага кенг кўламли бостириб киришининг уч йиллиги муносабати билан Европа Иттифоқи ташқи ишлар вазирларининг Брюсселдаги йиғилишида тақдим этилади.

Янги лойиҳа Украинага қўшимча ҳарбий ёрдам етказиб беришни, жумладан артиллерия снарядлари, ҳаво мудофаа тизимларини, шунингдек, бутун бригадаларни жиҳозлаш ва ўқитишни назарда тутади. Брюсселнинг даъво қилишича, Украина томони айнан шу сўровларни ўз шерикларига киритган.