Ирландия Киевга махсус топшириқли кучларни юбориши мумкин

Ирландия ҳукумати хавфсизлик вазифаларини бажариш учун махсус кучларни хорижга жўнатишга рухсат берувчи қонун лойиҳасини маъқуллади. Бу ҳақда 5 март, чоршанба куни Irish Independent ва The Irish Times нашри хабар берди. Ирландия Мудофаа вазирлиги баёнотида айтилишича, қонунчиликдаги ўзгаришлар «айниқса Ирландия фуқароларини қўллаб-қувватлаш, шунингдек, элчихоналаримизни ҳимоя қилиш ва чет элдаги ҳимоя вазифаларини бажариш учун муҳим».

Киевдаги Ирландия элчихонаси хусусий компания томонидан қўриқланади

The Irish Times таъкидлаганидек, Ирландия мудофаа кучлари таркибидаги элита бўлинмаси бўлган Army Ranger Wing (ARW)аъзолари 2022 йилда Ирландия Киевда ўз элчихонасини Россиянинг мамлакатга кенг кўламли бостириб киришидан кейин қайта очганида, Ирландия расмийларини ҳимоя қилиш учун Украинага жўнатилиши керак эди.

Бироқ, Дублин ҳукумати Ирландия қонунчилигида хавфсизлик мақсадида хорижда Ирландия қўшинларини жойлаштиришга рухсат берувчи махсус қоидалар йўқлигини билдирган юридик хулосани олди. Бу қонуний тўсиқ мамлакат Ташқи ишлар вазирлигини Ирландиянинг Украинадаги элчиси Тереза Хилли ва элчихонанинг бошқа ходимларини ҳимоя қилиш учун хусусий хавфсизлик компаниясини ёллашга мажбур бўлишига олиб келди.