Макрон: Европа Киевга хавфсизлик кафолатларини беришга тайёр

Европа Украинага хавфсизлик кафолатларини, жумладан, мамлакатга тинчликпарвар кучларини юборишга тайёр. Бу ҳақда Франция президенти Эммануэл Макрон 24 феврал, душанба куни Вашингтонда АҚШ президенти Доналд Трамп билан Украинадаги урушни тугатиш йўллари муҳокама қилинган музокарадан сўнг айтиб ўтди.

Шу билан бирга, сулҳни таъминлаш учун АҚШнинг «кучли» иштироки зарур, деди Макрон. Бундан ташқари, уч йилдан бери давом этаётган кенг кўламли урушни тугатиш учун музокараларда Украина ҳукуматининг иштироки зарур, дея қўшимча қилди у. Макрон, шунингдек, мақсади Украинада мустаҳкам тинчлик ўрнатиш эканини таъкидлади.

Трамп: Путин Украинага тинчликпарвар кучларни юборишга рози

Ўз навбатида, Трамп АҚШ эҳтимолий ўт очишни тўхтатиш учун хавфсизлик чораси сифатида Украинага Европа тинчликпарвар қўшинларини юбориш ғоясини қўллаб-қувватлашини айтди. Оқ уй раҳбарининг сўзларига кўра, у бу ғояни Россия президенти Владимир Путин билан муҳокама қилган. У гўё бундай вариантни қабул қилишини айтган, дея қўшимча қилди Америка президенти.

Шу билан бирга, Трамп яқин ҳафталарда Украинадаги уруш эҳтимолий якунланишини маълум қилди. «Ўйлайманки, биз бир неча ҳафта ичида бу ишни тугатишимиз мумкин. Агар биз ақлли бўлсак. Агар ақлли бўлмасак, бу давом этади ва биз ўлмаслиги керак бўлган ёш, гўзал инсонларни йўқотишда давом этамиз. Ва биз буни хоҳламаймиз», деди АҚШ президенти. «Украина босиб олган ҳудудларини бериши керакми?» деган саволга у: «Кўрамиз», деб жавоб берди.