АҚШ Украина бўйича БМТ резолюцияси лойиҳасини тақдим этди

Қўшма Штатлар Россиянинг Украинага кенг кўламли бостириб киришининг уч йиллиги муносабати билан БМТ резолюцияси лойиҳасини тақдим этди. Бу ҳақда 21 феврал, жума куни ҳужжатни кўриб чиққан Reuters агентлиги хабар берди. Вашингтоннинг уч бандлик қисқача резолюция лойиҳасида «Россия-Украина можароси»да инсонларнинг ҳалок бўлганидан афсус билдирилган ва «Бирлашган Миллатлар Ташкилотининг асосий мақсади халқаро тинчлик ва хавфсизликни сақлаш ҳамда низоларни тинч йўл билан ҳал этиш» дейилган. Вашингтон таклиф қилган резолюция, шунингдек, «можарони тезроқ тугатишга» ва кейинчалик «Украина ва Россия ўртасида мустаҳкам тинчлик» ўрнатишга чақиради.

AFP агентлиги дипломатик манбаларга таянган ҳолда таъкидлаганидек, АҚШ томонидан илгари сурилган лойиҳада Украинанинг Россия томонидан босиб олинган ҳудуди ҳақида ҳеч қандай эслатма йўқ. Вашингтон томонидан таклиф этилган ва қўллаб-қувватланган аввалги резолюциялардан фарқли ўлароқ, сўнгги лойиҳада Москва танқид қилинмайди ёки у можаро манбаси деб аталмайди.

Россия АҚШ резолюция лойиҳасини олқишлади, лекин унга тузатишларни таклиф қилди

Россия «можарони тезроқ тугатишга чақиради» деган сўзлардан кейин «жумладан, унинг асосий сабабларини бартараф этиш орқали» иборасини қўшиш орқали ҳужжатга ўзгартириш киритишни таклиф қилди, деб ёзади Reuters. Россиянинг БМТдаги доимий вакили Василий Небензя эса Америка лойиҳасини «яхши қадам» деб атади.

Исмини ошкор қилишни истамаган россиялик дипломатнинг Reuters агентлигига айтишича, агар тузатиш БМТ Бош Ассамблеяси томонидан қабул қилинса, Москва АҚШ резолюциясига овоз беради. Небензянинг айтишича, АҚШ расмийлари лойиҳа Бош Ассамблеянинг 193 аъзосига тарқатилишидан олдин уни хабардор қилган.

Бирлашган Миллатлар Ташкилоти Бош Ассамблеяси 24 феврал куни Украина ва Европа Иттифоқи томонидан тайёрланган деэскалация, ҳарбий ҳаракатларни тезда тугатиш ва БМТ Низоми ва халқаро ҳуқуқ нормаларига мувофиқ тинч йўл билан ҳал қилишга чақирувчи резолюция лойиҳасини овозга қўйиши керак. Ундан олдин Европа Иттифоқининг БМТдаги доимий вакиллари АҚШ таклифини муҳокама қилиши кутилмоқда.