Hafta davomida harorat pasayib, yomg‘ir yog‘ishi kutilmoqda

O‘zbekistonda haftaning ikkinchi yarmidan harorat asta-sekin pasayib, yomg‘ir yog‘adi, deya xabar bermoqda O‘zgidromet agentligi.

Dushanba kuni O‘zbekistonning katta qismida yog‘ingarchiliksiz ob-havo bo‘lishi kutilmoqda, faqat Farg‘ona vodiysi viloyatlarida va kunning ikkinchi yarmida Toshkent viloyatida ba’zi joylarda qisqa muddatli yomg‘ir yog‘ishi, momaqaldiroq kuzatilishi mumkin.

Seshanba kuni respublika bo‘yicha yog‘ingarchilik kutilmaydi. Ushbu kunlarda havo harorati +24…+29 daraja atrofida, janubda ba’zi joylarda +32…+37 darajagacha bo‘ladi.

Chorshanbada respublikaning ayrim joylarida biroz yomg‘ir yog‘ishi mumkin. Payshanba va juma kunlari respublikaning katta qismida momaqaldiroq bilan qisqa muddatli yomg‘ir yog‘adi.

Havo harorati asta-sekin pasayadi, respublika hududining katta qismida 16 aprelda +20…+25 daraja, 17 aprelda +18…+23, 18 aprelda +16…+21 daraja bo‘ladi.

Shamol 7–12 metr/soniya tezlikda esadi, ba’zi joylarda 15–20 metr/soniyagacha kuchayishi mumkin. Tog‘oldi va tog‘li hududlarda vaqti-vaqti bilan yomg‘ir yog‘adi, 17–18 aprel kunlari ba’zi joylarda kuchli bo‘ladi, ayrim joylarda momaqaldiroq kuzatiladi.

14–18 aprel kunlari respublikaning tog‘oldi va tog‘li hududlarida sel-suv toshqin hodisalari yuzaga kelishi mumkin.

Toshkent shahrida dushanbaning ikkinchi yarmida biroz yomg‘ir yog‘ishi mumkin, ertaga yog‘ingarchilik kutilmaydi. Harorat asosan +25…+28 daraja bo‘ladi. 16 aprelda biroz yomg‘ir yog‘ishi mumkin. Harorat +23…+25 daraja bo‘ladi.

17–18 aprel kunlari vaqti-vaqti bilan qisqa muddatli yomg‘ir yog‘adi, momaqaldiroq bo‘ladi. Harorat asta-sekin +17…+20 darajagacha pasayadi. Shamol sharqdan 3–8 metr/soniya tezlikda esadi, vaqti-vaqti bilan 12–15 metr/soniyagacha kuchayadi.