O‘zbekiston va AQSh foydali qazilmalar bo‘yicha bitim imzoladi

O‘zbekiston va AQSh o‘rtasida turli yo‘nalishlarda bir qancha yangi biznes shartnomalari tuzildi, deb xabar beradi Investitsiyalar, sanoat va savdo vazirligi matbuot xizmati.

Qayd etilishicha, vazir Laziz Qudratov boshchiligidagi Investitsiyalar, sanoat va savdo vazirligi delegatsiyasi AQShda bo‘lib, yirik kompaniyalar, korporatsiyalar va sanoat birlashmalari rahbarlari bilan uchrashuv va muzokaralar o‘tkazgan.

Tashrif dasturiga muvofiq, 7 aprel kuni tog‘-kon sanoati, mehmonxona biznesi va oziq-ovqat sanoati sohasida faoliyat yurituvchi korxonalar bilan uchrashuvlar tashkil etilgan.

Ta’kidlanishicha, uchrashuvlarda kompaniyalarga samarali investitsiya takliflari va O‘zbekistonda biznesni olib borish uchun yaratilgan shart-sharoitlar taqdim etilgan. Kompaniyalar rahbarlari O‘zbekistonda amalga oshirilayotgan islohotlarga yuqori baho bergan va Amerika kompaniyalarining mamlakatda ko‘p yillik tajribaga ega bo‘lgan muvaffaqiyatli faoliyatidan kelib chiqib, hamkorlikni rivojlantirishga tayyor ekanliklarini bildirgan.

Uchrashuvlar yakunlari bo‘yicha foydali qazilmalar sohasida hamkorlik to‘g‘risida kelishuvlar imzolangan hamda foydali qazilma konlarini qidirish va qazib olishga investitsiyalar kiritish, yuqori darajada maydalash komplekslarini (HPGR) qurish, innovatsion texnologiyalarni jalb etish va muhim xomashyo uchun qo‘shilgan qiymat yaratish, o‘zbekistonlik mutaxassislarning malakasini oshirish bo‘yicha kelishuvlarga erishilgan.

Turizm sohasida yangi loyihalar – mehmonxonalar qurishni amalga oshirish muddatlari ham kelishib olingan.

«Erishilgan kelishuvlar tegishli bitimlar bilan mustahkamlandi. Har bir loyihaga mas’ul loyiha menejeri tayinlandi», — deyiladi xabarda.

Avvalroq AQSh davlat kotibi o‘rinbosari Landau O‘zbekistonning fuqarolik atom energetikasi, muhim foydali qazilmalar va boshqa iqtisodiy biznes sohalariga sarmoya kiritish bo‘yicha ikki tomonlama hamkorlikni mustahkamlash borasidagi sa’y-harakatlarini qayd etgandi.

Eslatib o‘tamiz, 2024 yil sentabrda O‘zbekiston va AQSh o‘rtasida muhim minerallar bo‘yicha memorandum imzolangan edi.