Rossiyada mehnat migrantlari uchun o‘z maqomini qonuniylashtirish muddati uzaytirildi

10 sentabrgacha chet el fuqarolari Rossiyada bo‘lishini qonuniylashtirishi yoki mamlakatdan chiqib ketishlari kerak.

Foto: TASS

Rossiya prezidenti Vladimir Putin mehnat muhojirlari uchun o‘z maqomini qonuniylashtirish muddatini uzaytirdi. Huquqiy hujjatlar portalida davlat rahbarining tegishli farmoni paydo bo‘ldi.

Rossiya Federatsiyasi hududida noqonuniy bo‘lgan chet el fuqarolari yoki fuqaroligi bo‘lmagan shaxslar 2025 yil 10 sentabrgacha o‘z huquqiy holatini tartibga solishi yoki mamlakatni tark etishi kerak.

2024 yil dekabrida Rossiya prezidenti Vladimir Putin muhojirlardan 30 aprelgacha o‘z maqomini qonuniylashtirish yoki mamlakatni tark etishni talab qiluvchi farmonni imzoladi. RBK ta’kidlaganidek, hujjat Rossiyaning o‘tgan bahorda boshlangan migratsiya siyosatining keskinlashuvi oqibati bo‘lgan.

5 fevraldan boshlab Rossiyada migratsiya qonunchiligini buzgan xorijliklarni o‘z ichiga olgan nazorat ostidagi shaxslar reyestri ishga tushirildi. Ro‘yxatga kiritilgan migrantlar 30 aprelga qadar yo Rossiya Federatsiyasini tark etishi yoki Rossiya Ichki ishlar vazirligi orqali o‘z maqomini tartibga solishi kerak.

O‘zbekiston elchixonasi vatandoshlarni Rossiya Federatsiyasi Ichki ishlar vazirligi saytida o‘z maqomini tekshirishga va turli xil oqibatlarni keltirib chiqarmaslik uchun uni qonuniylashtirish choralarini ko‘rishga chaqirdi.

#Rossiya #migrant