Tramp Rossiyadan Ukrainani bombalashni to‘xtatishni talab qilmoqda

AQSh prezidenti Donald Tramp Rossiyani Ukrainani bombardimon qilishni to‘xtatishga chaqirdi. «Biz Rossiya bilan gaplashyapmiz. Ular to‘xtashini istardik. Menga bombalashlari yoqmaydi. Bombardimon qilish esa davom etmoqda va davom etmoqda. Har hafta odamlar va minglab yoshlar halok bo‘lmoqda», – dedi Tramp jurnalistlarning Rossiya bilan muzokaralar haqidagi savoliga javob berarkan.

6 aprel kuni Air Force One samolyoti bortida OAV vakillari bilan muloqot chog‘ida Tramp urush – «hech qachon boshlanmasligi kerak bo‘lgan dahshatli narsa» ekani haqidagi so‘zlarini takrorladi. Uning so‘zlariga ko‘ra, agar 2022 yilda prezident lavozimini u egallaganida, urush boshlanmasligi 100 foizga kafolatlangan bo‘lardi.

Kreml Trampning so‘zlariga javoban Rossiya prezidenti Vladimir Putin «o‘t ochishni to‘xtatish zarurligi haqidagi g‘oyani qo‘llab-quvvatlashini, biroq bungacha bir qator savollarga javob berish kerakligi»ni aytdi. RF prezidenti matbuot kotibi Dmitriy Peskov 7 aprel kuni jurnalistlar uchun o‘tkazilgan brifingda shunday bayonot berdi.

«Bu savollar hech kim javob bermagunicha havoda muallaq turibdi. Bu Kiyev rejimining nazoratsizligi bilan ham, Kiyev rejimi o‘ziga bo‘ysunmaydigan bir qator ekstremistik va millatchi bo‘linmalarning harakatlarini nazorat qila olmasligi bilan ham bog‘liq. Bu Kiyevni yanada harbiylashtirish rejalari va hokazo va hokazolar bilan ham bog‘liq», – dedi Peskov (iqtibos «Vy slushali Mayak» telegram-kanalidan).

O‘t ochishni tezroq to‘xtatish zarurligi haqidagi fikrga qo‘shilgan holda, biz o‘z manfaatlarimizni ta’minlashimiz va men aytgan jihatlarga oydinlik kiritishimiz kerak.

RF qurolli kuchlari muntazam ravishda Ukraina hududlariga zarbalar bermoqda. So‘nggi vaqtlardagi eng halokatli zarbalardan biri 4 aprel kuni kechqurun «Iskander-M» raketa kompleksidan uchirilgan Rossiya raketasi Kriviy Rihdagi turar joy kvartaliga kelib tushishi bo‘ldi. So‘nggi ma’lumotlarga ko‘ra, 20 kishi halok bo‘lgan, 70 dan ortiq kishi jarohatlangan. Ukraina rasmiylari turar joy binolari zarbaga uchraganini ma’lum qildi. Rossiya mudofaa vazirligi shahardagi restoranlardan birida yig‘ilish o‘tkazayotgan ukrainalik harbiylar hujum nishoni bo‘lganini iddao qildi.

Dmitriy Peskov 7 aprel kuni Kriviy Rihga zarba berilgani haqidagi savolga javob berarkan, jurnalistlarga Rossiya harbiylari «faqat harbiy va urushga aloqador nishonlarga zarba berayotgani»ni aytdi. «Ijtimoiy obektlarga, ijtimoiy infratuzilma obektlariga hech qanday zarba berilmayapti», – dedi Peskov. Shu bilan birga, uch yildan ortiq urush davomida Ukrainadagi ijtimoiy obektlar muntazam ravishda rus harbiylari zarbalariga nishon bo‘lib kelmoqda.

AQSh fevral oyi o‘rtalarida Rossiya va Ukraina bilan urushni tugatish bo‘yicha muzokaralarni boshladi. O‘shandan beri Donald Tramp Vladimir Putin va Volodimir Zelenskiy bilan bir necha bor alohida gaplashdi, uch davlat vakillari Saudiya Arabistonida bir necha bor muzokara o‘tkazdi.

Rossiya va Ukraina AQShning energetika infratuzilmalariga zarba berish bo‘yicha taklifiga rozi bo‘lgan (ammo muntazam ravishda bir-birini moratoriyni buzishda ayblab keladi). AQSh va Ukraina tomonlar Qora dengizda sulhga amal qilish bo‘yicha kelishib olishganini xabar qilgan. Rossiya esa faqat qishloq xo‘jaligi mahsulotlari eksporchilariga qo‘yilgan sanksiyalar bekor qilingach hamda Rosselxozbank Yevropa yurisdiksiyasida ishlovchi SWIFT tizimiga ulangachgina dengizdagi sulhga rozi bo‘lishini bildirgan.

Shu bilan birga, Rossiya AQShning o‘t ochishni to‘xtatish rejimi kiritish bo‘yicha Ukraina rozi bo‘lgan taklifiga rozi bo‘lmagan.