Britaniyaliklar to‘liq ofisga qaytishdan ko‘ra ishdan bo‘shashni afzal ko‘rmoqda - tadqiqot

Buyuk Britaniyada ishlaydigan mutaxassislarning deyarli yarmi (48 foizi) agar ish beruvchi ularni hafta davomida to‘liq ofisga qaytishga majbur qilsa, ishdan bo‘shash arizasini yozishga tayyor. Bu haqda Hays rekruting kompaniyasi tadqiqotlariga tayanib, The Guardian xabar berdi. 

Qayd etilishicha, ayol mutaxassislar orasida bu ko‘rsatkich yanada yuqori — 58 foiz. So‘rov 8 mingdan ortiq xodimga ega kompaniyalar orasida o‘tkazilgan.

Xodimlarning 75 foizi gibrid ish jadvalini, ya’ni haftaning faqat bir qismini ofisda o‘tkazishni ma’qul ko‘radi. Hozirda bu kabi ish jadvalidan kompaniyalarning 77 foizi foydalanmoqda. Eng keng tarqalgan variant — haftada 3 kun ofisda ishlash bo‘lib, kompaniyalarning 25 foizi uni joriy etgan. 

Mutaxassislarning 77 foizi uyda ko‘proq ishlashni xohlashining asosiy sababi — ish joyiga borishdagi transport xarajatlaridir. 

Ish beruvchilarning 66 foizi xodimlarni to‘liq ofisga qaytishga majbur qilish salbiy oqibatlarga olib kelishidan xavotirda. Shu bilan birga, kompaniyalarning 52 foizi ofisda ishlaydigan va uydan ishlaydiganlarning samaradorligi bir xil ekanini ma’lum qilgan. Shunga qaramay, so‘rovda ishtirok etgan kompaniyalarning 25 foizi xodimlarni ofisda tez-tez bo‘lishga chaqirgan.

Hays kompaniyasining operatsion direktori Pem Lindsi-Dannga ko‘ra, ish beruvchilar ofisga majburiy qaytishni joriy qilsa, eng yaxshi mutaxassislarni yo‘qotish xavfi borligini tushunishlari zarur.