Qozog‘istondan ota-ona qaramog‘isiz qolgan 10 nafar bola O‘zbekistonga qaytarildi

Toshkent xalqaro aeroportida Olmaotadan parvoz qilgan samolyot o‘zbekistonlik yosh vatandoshlarni olib keldi, deb xabar beradi Ijtimoiy himoya milliy agentligi.

Qayd etilishicha, bolalarga O‘zbekiston Ichki ishlar va Sog‘liqni saqlash vazirliklari xodimlari hamrohlik qilgan. O‘zbekistonning Qozog‘istondagi konsullik xodimlari ushbu bolalarning tez va xavfsiz vatanga qaytishini ta’minlash maqsadida barcha zarur hujjatlarni rasmiylashtirgan.

Ayni paytda bolalar vaqtincha Toshkent shahar IIBB qoshidagi voyaga yetmaganlarga ijtimoiy-huquqiy yordam ko‘rsatish markaziga joylashtirilgan. Bolalardan 8 nafari yaqin kunlarda Qoraqalpog‘iston Respublikasiga yo‘l oladi va u yerda «Inson» ijtimoiy xizmatlar markazlari tomonidan tayyorlangan oila a’zolari hamda yaqin qarindoshlariga topshiriladi.

Ma’lumotlarga ko‘ra, o‘tgan uch oyda xorijdan vatanga qaytarilgan bolalar soni 31 nafarni tashkil qilgan — bu o‘tgan yilning shu davriga nisbatan 2,5 barobar ko‘p.

Ta’kidlanishicha, yaqin kunlarda Sankt-Peterburgdan 10 nafardan ortiq bolalardan iborat guruh ham O‘zbekistonga qaytarilishi rejalashtirilgan.

Eslatib o‘tamiz, 29 mart kuni Rossiyada ota-ona qaramog‘isiz qolgan 11 nafar voyaga yetmagan o‘zbekistonlik bola vatanga qaytarilgan edi.