O‘zbekiston va Qozog‘iston temiryo‘l tutashuvlarida o‘tkazish qobiliyati oshiriladi

Qozog‘istonda qo‘shni davlatlar bilan temiryo‘l kesishmalarida o‘tkazuvchanlikni oshirish bo‘yicha bir qator chora-tadbirlar amalga oshirilmoqda.

Foto: iStock

"Kazinform" xalqaro axborot agentligi ma’lumotiga ko‘ra, bu haqda Markaziy kommunikatsiyalar xizmatida bo‘lib o‘tgan brifingda Qozog‘iston Transport vazirligining Temiryo‘l va suv transporti qo‘mitasi raisi o‘rinbosari Nurjan Kelbug‘anov ma’lum qilgan.

"Rossiya bilan to‘qqizta temiryo‘l kesishmasida yuk va yo‘lovchilar oqimini optimallashtirish bo‘yicha ikki tomonlama ishlar boshlandi. Xususan, Semiglavyy Mar, Orsk, Iletsk, Kartali va Kurkamis tutashuvlarida o‘tkazish qobiliyati 20 foizga oshiriladi. Bu kutish vaqtini sezilarli darajada qisqartiradi va yuk tashish hajmini oshiradi", – deya Nurjan Kelbug‘anov so‘zlaridan iqtibos keltirilgan maqolada.

Qayd etilishicha, modernizatsiya ishlari O‘zbekiston bilan chegarada joylashgan Sariag‘ash chorrahasida ham olib borilgan. "Bu yerda qurilgan yangi yo‘llar o‘tkazish qobiliyatini 12 foizga oshirish imkoniyatini beradi", – deb yozgan "Kazinform".

#temiryo‘l #Qozog‘iston