AQSh prezidenti Donald Tramp Ukraina hukumati bilan o‘zaro kelishuv tuzish niyatida ekanini ma’lum qildi. Unga ko‘ra, Kiyev nodir metallari evaziga Amerika yordamini qabul qilishni boshlaydi.

«Biz Ukraina bilan kelishuv tuzish harakatidamiz, uning doirasida nodir metallar va boshqa narsalar evaziga o‘z yordamimiz bilan ta’minlashni davom etamiz», — deydi Tramp Oq uyda jurnalistlar bilan muloqotida.

Shuningdek, suhbat davomida Tramp Rossiya—Ukraina urushini hal qilish masalasida «katta siljish» borligini bildirgan. Ammo u boshqa biror tafsilotni ochiqlamagan.

Financial Times ma’lumotlariga ko‘ra, Ukraina hukumati o‘zining «g‘alaba rejasi»ni tayyorlashda Donald Tramp AQSh prezidentiga aylanishini inobatga olib ikkita band qo‘shgan. Ulardan birida Ukraina muhim tabiiy resurslarini g‘arb davlatlari bilan bo‘lishishi, ikkinchisida esa urush tugaganidan ukrainlar Amerikaning Yevropadagi ayrim qo‘shinlari o‘rnini egallashi ko‘zda tutilgan.

Donald Tramp 3 fevral kuni o‘z ma’muriyati Ukraina va Rossiya bilan muzokaralar hamda uchrashuvlar o‘tkazishni rejalashtirayotganini ma’lum qildi. Ukrainaning «Suspilne» telekanaliga ko‘ra, mamlakat Tramp ma’muriyati bilan uchrashuv jadvalini kelishmoqda. NV nashrining yozishicha, fevral o‘rtalarida Kiyevga Trampning Ukraina bo‘yicha maxsus vakili Kit Kellog kelishi mumkin.

Avvalroq Rossiya BAA va Saudiya Arabistonini Putin va Trampning ehtimoliy uchrashuv joyi sifatida ko‘rib chiqayotgani to‘g‘risida xabar berilgandi.