Amerikalik astronavtlar XKS bortidan yana ochiq kosmosga chiqdi

Stansiya komandiri Sunita Uilyams va bortmuhandis Butch Uilmor 5,5 soat davomida ochiq kosmosda bo‘lib, bir qator texnik ishlarni bajardi.

Foto: NASA

Amerikalik astronavtlar ochiq kosmosdagi bir necha soatlik ishlardan keyin Xalqaro kosmik stansiya (XKS) bortiga qaytdi, deb xabar beradi NASA.

Stansiya komandiri Sunita Uilyams va bortmuhandis Butch Uilmor soat 07:43 da Quest shlyuzi orqali kosmik vakuumga chiqqan. Ular 5,5 soat davomida texnik ishlarni olib borgan. Bu vaqt davomida astronavtlar radioantenna tugunini demontaj qilgan va stansiya korpusida mikroblar qidirish bilan shug‘ullangan.

16 yanvar kuni ham ushbu astronavtlar bir necha soatga ochiq kosmosga chiqib, astrofizik uskunalarga xizmat ko‘rsatgan edi.

Xalqaro kosmik stansiyada hozirda yetti kishidan iborat ekipaj faoliyat yuritmoqda — «Roskosmos» kosmonavtlari Aleksey Ovchinin, Ivan Vagner va Aleksandr Gorbunov, NASA astronavtlari Nik Xeyg, Donald Pettit, Butch Uilmor va Sunita Uilyams.

Eslatib o‘tamiz, XKS bortidagi amerikalik astronavtlar Treysi Dayson va Mettyu Dominik 13 iyunda kosmik vakuumga chiqishi kerak bo‘lgan, ammo skafandr bilan bog‘liq muammolar tufayli jarayon bekor qilingan edi. 24 iyunda astronavtlar ochiq kosmosga 31 daqiqaga chiqqan va Dayson skafandridagi sovitish konturidan suv oqqani sabab stansiyaga qaytishga majbur bo‘lgandi.

#XKS #astronavtlar