Huquq faollari Suriyada «qasos olish» holatlarini qayd etmoqda

Suriyada Bashar Asad rejimi tarafdorlaridan qasos olish kampaniyasi doirasida yil boshidan buyon 91 ta qotillik qayd etilgan. Bu haqda 26 yanvar, yakshanba kuni qarorgohi Londonda joylashgan Suriya inson huquqlari kuzatuv kengashi (SOHR) ma’lum qildi.

Uning ma’lumotlariga ko‘ra, jami qurbonlar soni 190 nafar, jumladan, besh nafar ayoldan iborat. Eng ko‘p halok bo‘lganlar Xoms, Xama va Loziqiyada qayd etilgan.

Huquq himoyachilari ta’kidlaganidek, jinoyatlar siyosiy va diniy sabablarga ko‘ra sodir etilmoqda, bu esa «xavfsizlikning halokatli buzilishi»dan dalolat beradi.

SOHR bu kabi jinoyatlar «suriyaliklar o‘rtasidagi bo‘linishni chuqurlashtirishi» va bunday qonunbuzarliklarga chek qo‘yish, barcha aybdorlarni javobgarlikka tortish va mamlakatga «xavfsizlik va barqarorlikni» qaytarish uchun qattiq choralar ko‘rish kerakligini bildirdi.

AFP xabar berishicha, qatl etilganlarning aksariyati Asad hukumatining sobiq amaldorlaridir. Suriyaning yangi hukumati nazorati ostidagi mahalliy qurolli guruhlarning o‘nlab a’zolari mamlakat g‘arbidagi Xoms viloyatida qo‘lga olindi.

Asadning ag‘darilishi

2024 yil oxirida Suriyadagi qurolli guruhlar yirik hujumda Asad rejimini ag‘dardi. Dekabr oyi boshida sobiq prezident oilasi bilan Rossiyaga qochishga majbur bo‘ldi.

Suriyaning o‘tish davri hukumatiga «Hay’at Tahrir ash-Shom» guruhi rahbari, avval Abu Muhammad al-Juloniy nomi bilan tanilgan Ahmad al-Shara boshchilik qildi. Dekabr oyi oxirida u sobiq isyonchilar yetakchilari bilan ularning bo‘linmalarini tarqatib yuborish va keyin mamlakat Mudofaa vazirligi qoshida birlashtirish bo‘yicha kelishuvga erishdi. Ahmad al-Shara bir qator G‘arb davlatlarining hukumat vakillari bilan bir necha uchrashuvlar o‘tkazdi. Shu bilan birga, Damashqdagi o‘tish davri hukumati va uni Yevropada qo‘llab-quvvatlovchi faollar Suriyaga qarshi sanksiyalarni yumshatishga chaqirdi.