Kun.uz'ga Surxondaryoning Boysun tumanidagi “Mustaqillikning 25 yilligi” gaz konidan olingan videotasvirlar kelib tushdi. 18 yanvarda olingani aytilgan tasvirlarga ko‘ra, hududda yong‘inli dara paydo bo‘lgan.

“Yopilgan quduq atrofidan shunday kichik-kichik “buloqcha”lar [ochilib], undan gaz sizib chiqqan, keyin yondirib qo‘yilgan. Bizga neft sizib chiqyapti deb bahona qilishyapti, yanayam anig‘ini bilish mushkul. Lekin bizga hidi kelmayapti. Rasmiylar anchadan beri jim, va’dalar berishgan edi”, – deydi kon yaqinida yashovchi fuqarolardan biri.

Yana bir fuqaroga ko‘ra, vaziyatni nazorat qilish uchun har bir “buloqcha” yoniga nazoratchilar qo‘yilgan.

“Gaz chiqayotgan har bir “buloqcha”larga nazorat qilish uchun bitta-bitta odam qo‘yilgan, 100 gektar bo‘lsa, qariyb 18-19 ta kichik-kichik joyidan gaz chiqyapti, 1-2 tasi katta-katta quduqlar”, – deydi u.

Kun.uz holat yuzasidan Energetika vazirligiga murojaat qildi. Vazirlik matbuot xizmati so‘rovni hozircha javobsiz qoldirmoqda.

M25 konini o‘zlashtirish bo‘yicha 2017 yilda boshlangan ishlar 2024 yil 1 sentabr kungi avariyadan keyin to‘xtab qolgan edi. O‘shanda kon atrofida yashovchi aholi ko‘chirilgan.

17 sentabr kungi takroriy avariyada pudratchi kompaniya – Eriell'ning 4 xodimi halok bo‘lgandi.

Kun.uz 9 noyabr kuni konda navbatdagi portlash kuzatilgani, shundan keyin yirik yong‘in chiqib, badbo‘y hid kamaygani haqida xabar bergandi.

Noyabr oyi boshida energetika vaziri Jo‘rabek Mirzamahmudov konni jilovlash uzog‘i 2-3 oy vaqt olishi mumkinligini aytgan edi.