2024 yilda 263,9 mlrd so‘mlik noqonuniy o‘tkazilgan xarid natijalari bekor qilindi. Bu haqda Korrupsiyaga qarshi kurashish agentligi ma’lumot berdi.

Jumladan, 2024 yilda 552,5 mlrd so‘mlik 273 ta xarid o‘rganilgan va 234 ta holatda 263,9 mlrd so‘mlik xarid natijalari bekor qilingan. Bu qariyb 86 foizni tashkil qiladi.

Shu bilan birga, noqonuniy xaridlar yuzasidan vazirlik va idoralarga 257 ta taqdimnoma kiritilgan, huquqni muhofaza qiluvchi va nazorat organlariga 273 ta so‘rovnoma yuborilgan.

Qonunchilik talablarini buzgan 104 nafar shaxs ma’muriy, 85 nafar shaxs intizomiy javobgarlikka tortilgan.

Qayd etilishicha, davlat buyurtmachilari tomonidan amalga oshirilayotgan xaridlarda qonunchilik talablariga rioya qilinishi holatlarini monitoringi davom ettiriladi.