Shu yilning 17 noyabr kuni Buxoro viloyatining Jondor tumanidagi qishloqlardan biridagi oilada gaz portlashi yuz bergan. Baxtsiz hodisa erta tongda – soat 5:30 lar atrofida sodir bo‘lgan. Bu xabarni Kun.uz'ning bir-biridan mustaqil ikki manbasi tasdiqladi.

Ma’lumotlarga ko‘ra, hodisa oqibatida oilaning 4 nafar a’zosi: er-xotin va ularning ikki nafar qizi kuyish jarohatini olib, RShTYoIM Buxoro filialiga olib borilgan. Ota va ona 75 foizdan yuqori kuyish jarohatlari oqibatida vafot etgan. Qizlarning ahvoli yaxshi ekani aytilmoqda. Oilaning yana 2 nafar o‘g‘il farzandi jarohat olmagan.

Holat yuzasidan FVV va Hududgazta’minot matbuot xizmatlari bilan bog‘landik. Ular holatni o‘rganib, rasmiy izoh berishini ma’lum qildi.

Bosh prokuraturaga ko‘ra, Buxoroda sodir bo‘lgan holat yuzasidan 22 noyabr kuni Jinoyat kodeksining  259-moddasi (Yong‘in xavfsizligi qoidalarini buzish) bilan jinoyat ishi qo‘zg‘atilgan. 

Hozirda ichki ishlar organlari tomonidan tergov harakatlari olib borilmoqda. 

• Shu yilning 22 oktyabr kuni Samarqand viloyatining Qo‘shrabot tumanida ko‘ngilsiz hodisa yuz berib, gaz portlashi oqibatida bir oilaning 4 a’zosi vafot etgani ma’lum qilingan edi.
• Shuningdek, 21 oktyabr kuni Andijon viloyati Jalaquduq tumanidagi xonadonlardan birida 4 kishi gazdan zaharlanib vafot etgan, oilaning yana 4 nafar a’zosi kasalxonaga yotqizilgan edi.