Qoraqalpog‘istonda 3 bosh Buxoro bug‘usini o‘ldirgan shaxs 3,3 mlrd so‘mlik zarar yetkazdi

Ekologiya, atrof-muhitni muhofaza qilish va iqlim o‘zgarishi vazirligi tasarrufidagi Quyi Amudaryo davlat biosfera rezervati xodimlari 3 bosh Buxoro bug‘usi ovlanganini aniqladi.

Foto: IIBB axborot xizmati

Holat Qoraqalpog‘iston Respublikasi Beruniy tumani IIB tomonidan o‘rganildi. O‘rganish davomida uchta bug‘u ov miltig‘i bilan o‘ldirilgani ma’lum bo‘ldi.

Hodisa joyi ko‘zdan kechirilganida rezervatning zaxira yerlaridan 2 ta ov miltig‘i o‘q dorisining plastik bo‘laklari, qonga o‘xshash qizil dog‘lar va ov miltig‘i topildi. Ov miltig‘i ashyoviy dalil sifatida olindi.

Qizil kitobga kiritilgan Buxoro bug‘ulari o‘ldirilishi natijasida hayvonot dunyosiga jami 3 mlrd 375 mln so‘mlik moddiy zarar yetkazilgan.

Holat yuzasidan fuqaro M.K. Jinoyat kodeksining 202-moddasi (hayvonot yoki o‘simlik dunyosidan foydalanish tartibini buzish) 3-qismida nazarda tutilgan jinoyatni sodir etganlikda gumon qilinib, qo‘lga olindi.

#Qoraqalpog‘iston #Buxoro bug‘usi