Donald Trampning AQSh prezidentligiga qayta saylanishi butun dunyoda ko‘plab jamoalar uchun muammoli bo‘lib turgan bir paytda Italiyaning Sardiniya orolidagi qishloqlardan biri vaziyatdan foydalanib qolish harakatiga tushdi, deb yozmoqda SNN.

Italiyaning aksariyat qishloqlari kabi, Ollolay ham aholi soni kamayishidan huvillab qolgan qishloq fayzini tiklash uchun chet elliklarni ko‘chirib kelish yo‘llarini izlamoqda. Xorijliklarni jalb qilish uchun qishloqdagi eski uylar atigi bir yevro — bir dollardan sal ko‘proqqa sotilmoqda.

5 noyabrdagi saylov natijalaridan so‘ng potensial amerikalik muhojirlar uchun veb-sayt ishga tushirildi. Saytda ko‘proq arzon uy-joylar taklif qilinmoqda. Shu tariqa, qishloq rahbariyati saylov natijalaridan norozi amerikaliklar bo‘sh turgan uylardan birini tezroq sotib olishiga umid qilmoqda.

 “Global siyosatdan charchadingizmi? Yangi imkoniyatlar ochib, yanada muvozanatli hayot kechirishni xohlaysizmi?” — deb so‘raydi sayt. “Sardiniyadagi jannatda yevropacha ta’tilni boshlash vaqti keldi”.

Qishloq meri Franchesko Kolumbu CNN telekanaliga veb-sayt prezidentlik saylovlari oldidan amerikalik saylovchilarni jalb etish maqsadida maxsus yaratilganini aytdi. U AQShni yaxshi ko‘rishini ta’kidlab, amerikaliklar uning qishlog‘ini qayta tiklashga yordam bera oladigan eng munosib insonlar ekaniga ishonchini bildirdi.

“Avvalo, amerikaliklarga e’tibor qaratishni va ular bilan ishlashni xohlaymiz”, — dedi u. “Albatta, boshqa mamlakatlardan kelgan odamlarga ariza topshirishni taqiqlay olmaymiz, lekin amerikaliklar uchun jarayon tezlashtiriladi. Ular qishlog‘imizni qayta jonlantirishga yordam berishiga umid qilyapmiz”.

“Imtiyozli munosabat”

Kolumbuning aytishicha, hozirda qishloq uch xil yashash imkoniyatini taklif qilmoqda: raqamli ko‘chmanchilar (dunyoning istalgan nuqtasidan turib, texnologik kompaniyalar uchun onlayn ishlaydigan xodimlar) uchun bepul vaqtinchalik turar joy, ta’mir talab qilinadigan bir yevrolik uylar va 100 000 yevrogacha (105 000 dollar) narxdagi yashashga tayyor uylar.

Shahar meri qiziqish bildirgan xaridorlarga barcha jarayonlarda hamrohlik qiladigan maxsus guruh tuzilganini ma’lum qildi. Bu guruh arzon uy-joylarni ko‘rsatish uchun yakka tartibdagi ekskursiyalarni tashkil etishdan tortib, pudratchilar va quruvchilarni topish hamda zarur hujjatlarni rasmiylashtirishgacha bo‘lgan jarayonlarda yordam beradi.

Bo‘sh turgan obektlarning fotosuratlari va rejalari tez orada saytga yuklanadi.

So‘nggi yuz yil ichida Ollolay aholisi 2250 kishidan 1300 kishiga kamaydi, u yerda har yili atigi bir nechta bola tug‘ildi. Ko‘plab oilalar og‘ir iqtisodiy davrda ish va yaxshiroq hayot izlab qishloqni tark etgan. Hozir u yerda atigi 1150 kishi yashaydi.

Qishloq aholi sonining kamayishini to‘xtatish maqsadida yangi odamlarni jalb qilishga astoydil urinayotgan bo‘lsa-da, amerikaliklarga “imtiyozli munosabat” ko‘rsatish taklifi biroz bahs-munozarali tuyulishi mumkin.

“Amerikaliklar tezlashtirilgan jarayondan o‘tadi. Ular qishlog‘imizni qayta tiriltirishga yordam berishiga umid qilamiz, ular bizning jyekpot kartamiz”, — dedi mer.

Saytda AQSh pasportiga ega bo‘lish majburiy deb aytilmagan, biroq shahar meri AQSh fuqarolariga boshqa nomzodlarga qaraganda afzallik berilishini ta’kidlamoqda.

“Albatta, yaqinda saylangan AQSh prezidentining ismiga alohida urg‘u berolmaymiz, lekin hammamizga ma’lum, hozirda ko‘plab amerikaliklar undan qochib, mamlakatni tark etishni istamoqda”, — deb qo‘shimcha qildi Kolumbu.

“Ushbu saytni aynan hozir, AQShda saylovdan keyin ko‘chishga bo‘lgan talabni qondirish maqsadida maxsus yaratdik. O‘tgan yili ishga tushirilgan raqamli ko‘chmanchilar dasturimizning birinchi versiyasi ham faqat amerikaliklarga mo‘ljallangandi”.

Merning so‘zlariga ko‘ra, so‘nggi vaqtlarda meriya veb-saytiga uylar haqida ma’lumot so‘rab 38 000 ta murojaat kelib tushgan, ularning ko‘pchiligi AQShdan yuborilgan.

Olisdagi jannat

Ollolay avvaldan yangi aholini jozibador uy-joy rejalari bilan jalb qilishga urinib keladi.

CNN xabariga ko‘ra, 2018 yilda shahar ma’muriyati eski bo‘sh uylarni bir yevroga sotishni boshlagan. Keyinchalik bo‘sh ish joylarini ramziy bir yevroga ijaraga berishga o‘tgan.

2023 yildan boshlab qishloq raqamli ko‘chmanchilar uchun “Ollolaydan ishlash” dasturini yo‘lga qo‘ydi. Shu paytgacha to‘rt nafar amerikalik ramziy bir yevro evaziga to‘liq jihozlangan uylarga joylashtirildi. Buning evaziga ular jamiyat uchun biror narsa, masalan, san’at asari yoki kitob yaratishi lozim edi.

Hokimiyat masofadan ishlaydigan xodimlar uchun mahalliy oilalarning uylarini ijaraga olish xarajatlarini qoplaydi, ikki yotoqxonali ko‘p qavatli uy uchun oyiga taxminan 350 yevro to‘lab beradi. Kommunal xizmatlar, mahalliy soliqlar va boshqa to‘lovlar ham qoplanadi.

Biroq qayta tiklash rejalari mahalliy hokimiyat umid qilganchalik yaxshi ketmayapti. Kolumbuning aytishicha, 2018 yildan buyon atigi 10 ta uy bir yevroga sotilgan va ta’mirlangan.

Qishloq hamon yarim bo‘sh turibdi, u yerda haligacha taxminan 100 ta egasiz arzon uy bor. Ular sotuvga qo‘yilgan va yashash uchun tayyor. Ularning barchasi xaritaga kiritilib, ro‘yxati tuzildi. Yaqin kunlarda xaridorlar ko‘rishi uchun uylarning suratlari internetga joylashtiriladi.

Binolarning ko‘pchiligi tarixiy markazda joylashgan bo‘lib, turli o‘lchamlarga ega. Ular mahalliy granit jinslaridan qurilgan fermer va cho‘ponlarning eski uylaridir. Ayrim tayyor obektlar qayta ta’mirlanib, zamonaviy qulayliklar bilan jihozlangan.

AQSh fuqarolaridan kelib tushgan arizalarga demografik talablar qo‘yilmaydi: ular har qanday yoshdagi shaxslar, nafaqaxo‘rlar, masofadan ishlovchilar yoki qishloqda kichik korxona ochishni xohlovchi tadbirkorlar bo‘lishi mumkin.

Ollolay serqatnov yo‘llardan uzoqda joylashgan bo‘lib, kundalik tashvishlardan xoli, oddiyroq hayot kechirishga intilayotganlar uchun juda mos keladi.

Tabiati yovvoyi, tog‘li hududda joylashgan bu makonda qadimiy dehqonchilik an’analari saqlanib qolgan. U musaffo havosi, kam sonli aholisi va go‘zal manzaralari bilan ajralib turadi.

Kuzda “cortes apertas” (ochiq hovlilar) deb ataladigan tadbir paytida otxonalar va qadimiy torfli mayxonalar jamoatchilik uchun eshiklarini ochadi, unda sharob, vetchina, pishloq va boshqa mazali taomlar taklif etiladi. Ushbu hudud o‘zining mahalliy ishlab chiqariladigan Casu Fiore Sardo pishlog‘i bilan mashhur.

Ollolayning yana bir o‘ziga xos bayrami har yilning fevralida o‘tkaziladigan niqobli karnavaldir.