Farg‘ona viloyatida iPhone 16 Pro Max hamda iPhone 15 Pro telefonlarining noqonuniy olib kirilishining oldi olindi, deb xabar beradi viloyat bojxona boshqarmasi matbuot xizmati.

Qayd etilishicha, Farg‘ona viloyati bojxona boshqarmasi Kontrabandaga qarshi kurashish bo‘limi xodimlari tomonidan tovar-moddiy boyliklarining chetdan noqonuniy olib kirilishining oldini olishga qarshi tezkor tadbir o‘tkazilgan.

Tadbir davomida fuqaro boshqaruvidagi Cobalt rusumli avtotransport vositasi Farg‘ona tumanining chegaraoldi hududidan tezkor kuzatuvga olingan. Ushbu avtotransport vositasi Farg‘ona shahri hududida harakatlanayotgan vaqtida to‘xtatilib, belgilangan tartibda ko‘zdan kechirilgan.

Natijada, avtomashina salonida xorijda ishlab chiqarilgan va bojxona rasmiylashtiruvidan o‘tganini tasdiqlovchi hujjatlari bo‘lmagan umumiy qiymati 750 million so‘mlik 30 dona iPhone 16 Pro Max va 10 dona iPhone 15 Pro rusumli uyali aloqa vositalari borligi aniqlangan.

Hozirda mazkur holat yuzasidan tergovga qadar tekshiruv harakatlari olib borilmoqda.

Eslatib o‘tamiz, 2021 yilda bojxonachilar 3,5 milliard so‘mlik telefonlarning noqonuniy aylanmasiga chek qo‘ygan edi. 2022 yilda esa chegaradan noqonuniy olib o‘tilgan qariyb 1 mlrd so‘mlik telefonlar musodara qilingani to‘g‘risida xabar berilgandi.