Toshkent xalqaro aeroportining uchib ketish zali va bosh binosi oralig‘ida joylashgan yashil maydonda mushuklar uchun uychalar paydo bo‘ldi. Ular Toshkent arxitektura-qurilish universiteti talabalari tomonidan loyihalashtirilgan, deb xabar berdi Uzbekistan Airports.

«Mushuklar shahar muhitining tabiiy aholisi bo‘lib, o‘zining ekologik o‘rniga ega. Poytaxt aeroportida doimo mushuklar bo‘lgan. Bu jonzotlarning odamlarga foydasi oydin, yoqimli estetikadan tashqari, uy sichqonlarini va hatto kalamushlarni yo‘q qiladigan haqiqiy ovchilardir… «Mushukkent» loyihasi va Toshkent arxitektura-qurilish universiteti talabalari bilan birgalikda uychalar loyihasini ishlab chiqdik va ularni aeroport faoliyati uchun ham, hayvonlarning o‘zlari uchun ham xavfsiz bo‘lgan joylarga o‘rnatdik», deyiladi xabarda.

Qayd qilinishicha, dizayn jarayonida uylar yemirilishga chidamli, yonmaydigan va ayni paytda ekologik toza materiallardan yig‘ilgan. Sovuq mavsumda isitish va issiqda shamollatish tizimlari ham o‘rnatilgan.

Ta’kidlanishicha, «Mushukkent» loyihasi 2019 yilda boshlangan bo‘lib, Toshkent shahar Ichki ishlar bosh boshqarmasi, O‘zbekiston Milliy gvardiyasi hamda boshqa davlat idoralari hamda nodavlat notijorat tashkilotlari tomonidan qo‘llab-quvvatlangan. Loyihaning asosiy maqsadlari jamiyatda hayvonlarga nisbatan insonparvar munosabatni targ‘ib qilish, shaharda mushuklar uchun uylar o‘rnatish, ko‘cha mushuklari sonini nazorat qilish, hayvonlarga nisbatan shafqatsiz munosabatda bo‘lganlik uchun jazoni kuchaytirishdan iborat.