Donald Tramp ma’muriyatida Ukraina bo‘yicha maxsus elchi lavozimi bo‘ladi, u AQSh tomonining urushni tugatishga qaratilgan muzokaralarini nazorat qiladi. Bu haqda Fox News manbalarga tayanib xabar berdi.

Maxsus vakilning nomi «tez orada» e’lon qilinadi, dedi manbalar. Bu «katta obro‘li shaxs» bo‘ladi va «tinch yo‘l bilan hal qilishga olib keladigan yechimlarni topish vazifasi yuklanadi».

Trampning 2017 yildan 2019 yilgacha bo‘lgan birinchi muddati davomida uning ma’muriyati allaqachon Ukrainada tinchlik muzokaralari bo‘yicha maxsus elchisiga ega edi (keyin u Minsk kelishuvlarini amalga oshirish bilan bog‘liq edi) - bu lavozimni egallagan birinchi va yagona shaxs Kurt Uoker bo‘lgan. Bayden ma’muriyatida bunday maxsus vakil yo‘q.

Uoker texnik jihatdan ko‘ngilli maslahatchi hisoblangan va davlat xizmatchisi sifatida maosh olmagan. Fox News qayd etishicha, yangi maxsus vakil ham o‘z vazifalarini bepul bajarishi mumkin.

Saylov kampaniyasi davomida Tramp agar prezident bo‘lsa, urushni imkon qadar tezroq tugatishini, Moskva va Kiyevni muzokara boshlashga majbur qilish yo‘lini topishini bir necha bor ta’kidlagan.

Finlyandiya prezidenti Aleksandr Stubb 12 noyabr kuni Tramp bilan telefon suhbatidan so‘ng «imkon qadar tezroq tinchlik kelishuviga erishishga jiddiy yondashayotganini» aytdi. Uning qayd etishicha, buning uchun Trampning 20 yanvardagi inauguratsiyasi oldidan yaxshi imkoniyat bor.

Rossiya prezidenti Vladimir Putin AQSh prezidenti saylovidan keyin Tramp bilan muloqotga ochiq ekanini aytdi. Washington Post gazetasining yozishicha, ushbu bayonotdan keyin bir necha soat ichida Putin va Tramp telefonda gaplashgan. Tramp Putinni «Ukrainadagi urushni kuchaytirmaslikka» chaqirgan va Yevropada AQSh harbiylarining borligini eslatgan. Kreml bunday suhbat bo‘lganini inkor qildi.