Bu galgi saylovlarda siyosiy partiyalar tomonidan ko‘rsatilagan deputatlikka nomzodlarning 616 nafari nogironligi bo‘lgan shaxslar ekanligi saylovlarning inklyuzivligini ko‘rsatmoqda.

Shuningdek, saylov komissiyalari tarkibida 1 343 nafar nogironligi bo‘lgan shaxslar vakillari faoliyat ko‘rsatib kelmoqda.

Tahlillarga ko‘ra, respublika bo‘ylab saylovchilar orasida 832 ming nafar nogironligi bo‘lgan shaxslar borligi hamda ularning 105 ming nafari bo‘lajak saylovda ishtirok etishi uchun o‘zgalar ko‘magiga muhtoj ekanligi aniqlangan.

Shundan kelib chiqib, saylovlarda mustaqil ishtirok eta olmaydigan har bir saylovchiga ovoz berishga ko‘maklashish uchun 16 mingga yaqin volontyorlar biriktildi.

E’tiborlisi shundaki, nogironligi bo‘lgan shaxslarni saylovdagi ishtiroki uchun tegishli infratuzilmaviy sharoitlar yaratilmoqda. Xususan,

– ovoz berish xonalariga maxsus jihozlangan yashirin ovoz berish kabinalari joylashtirildi;

– ko‘zi ojiz va zaif ko‘ruvchi saylovchilar mavjud bo‘lgan saylov uchastkalari optik lupalar bilan ta’minlandi;

– barcha saylov uchastkalari Brayl alifbosi asosida tayyorlangan trafaretlar bilan ta’minlandi;

– uchastka binolari nogironlar aravachasiga moslashtirilgan nishab yo‘laklari (panduslar) yoki “yordamga chaqirish” tugmasi bilan jihozlandi.

Bundan tashqari, saylovga oid axborotlarda surdo tarjima, subtitr yozuvi, Brayl alifbosi va boshqa shakllar orqali yetkazilib kelinmoqda.