Polsha prezidenti Anjyey Duda Germaniyadan Ikkinchi jahon urushi paytida yetkazilgan zarar uchun tovon puli talab qildi. «Kechirim so‘rash va aybni tan olish boshqa narsa, tovon to‘lash boshqa», dedi Duda 1 sentabr, yakshanba kuni fashistlar Germaniyasi Polshaga bostirib kirgani 85 yilligi munosabati bilan Polshaning Lodz voyevodligidagi Velyun shahrida so‘zlagan nutqida. «Va bu masala haligacha hal etilmagan, agar Ikkinchi jahon urushi yillarini hisoblasangiz, 80 yildan beri», dedi Duda.
Velyun Ikkinchi jahon urushida fashistlar samolyotlari tomonidan bombardimon qilingan birinchi Polsha aholi punktlaridan biri bo‘lib, hujum natijasida 1200 ga yaqin mahalliy aholi halok bo‘lgan, deya eslatadi dpa agentligi. Umuman olganda, urush yillarida Polshada 6 millionga yaqin kishi halok bo‘ldi, mamlakat poytaxti Varshava deyarli butunlay vayronaga aylandi.
Milliy konservatorlar o‘rnini egallagan Donald Tuskning markaziy so‘l hukumati tovon to‘lash masalasini kun tartibidan olib tashlamagan.
Shols nemis istilosi jabrdiydalarga yordam berilishini e’lon qildi
Germaniya kansleri Olaf Shols iyul oyi boshida Germaniya-Polsha hukumatlararo maslahatlashuvlarida Polshadagi nemis bosqinidan omon qolgan jabrdiydalarga yordam ko‘rsatilishini e’lon qildi.
Shols so‘zlariga ko‘ra, Germaniya «o‘z aybining og‘irligini tan oladi». Uning qayd etishicha, Berlin tarixiy javobgarlik tamoyiliga amal qilishda davom etmoqda. Donald Tusk, o‘z navbatida, moliyaviy yordam bir necha oy ichida kelishi kerakligini aytdi. Siyosatchilar Ikkinchi jahon urushi davrida nemis istilosidan jabr ko‘rgan 40 mingga yaqin polshaliklarga to‘lanadigan tovon miqdori qancha bo‘lishini aniqlashtirmadi.
Polsha sobiq hukumati 1,3 trillion yevro olmoqchi edi
Polshaning «Qonun va adolat» (QvD) partiyasi tomonidan tuzilgan avvalgi konservativ hukumati Berlindan tovon puli sifatida 1,3 trillion yevro talab qilgan edi. 2022 yil sentabr oyida QvD rahbari Yaroslav Kachinskiy shunday degan edi: «Germaniya Polshaga qarshi jinoyatlari uchun hech qachon javobgarlikka tortilmagan. Germaniyaning Polsha millatiga qarshi jinoyatlar bo‘yicha tarixiy siyosati qabul qilinmagan. Biz nemis xalqining o‘zini-o‘zi anglashini tiklashga harakat qilishimiz kerak».
