AQShda 60 yoshli ayol to‘rt kundan keyin ish joyidan jonsiz holatda topildi, deb xabar beradi NBC News. Huquq-tartibot idoralariga ko‘ra, ayol 16 avgust kuni binoga kirib ketganida oxirgi marotaba skanerlash tizimidan o‘tgan va shu bilan hech qayerda qayd etilmagan.

Tempe shahri politsiyasiga 20 avgust kuni Wells Fargo bank korporatsiyasi binosidan murojaat kelib tushgan va unda amerikalik ayol ish joyidan jonsiz holatda topilgani aytilgan.

Kompaniya xodimlarining aytishicha, Deniz Pryudommning jasadiga tasodifan duch kelishgan. Marhumaning jasadi topilishidan oldin ofisdagi bir necha kishi Denizning xonasi joylashgan uchinchi qavatdagi koridordan badbo‘y hid tarqalayotgani haqida shikoyat qilgan. Ammo xodimlar bu hid kanalizatsiyadagi muammolar tufayli tarqalmoqda deb o‘ylagan.

Xavfsizlik xizmati xodimlari tekshiruvlar davomida Pryudomm binodan chiqishda ruxsatnomasini skanerdan o‘tkazmaganini aniqlagan.

Ayolning o‘limiga nima sabab bo‘lgani noma’lum. Tempe politsiyasi Jinoiy ishlar byurosi Marikopa okrugi sud-tibbiyot ekspertlari bilan buning ustida ish olib bormoqda. Xodimning ish kabinetida o‘tkazilgan dastlabki o‘rganishlar davomida politsiya hech qanaqa qotillik alomatlarini aniqlamagan. «Shuncha vaqt Deniz Pryudommning yo‘qolib qolganiga necha hech kim e’tibor bermagani tushunarsiz», — deyiladi xabarda.

Wells Fargo bank kompaniyasi Deniz Pryudommning yaqinlariga hamdardlik izhor etgan. Shuningdek, zarurat tug‘ilsa, rahbariyat yuz bergan fojia sabab barcha xodimlariga psixologik yordam ko‘rsatilishini va’da qilgan.