Putin Ukrainaning Kursk oblastidagi maqsadlarini sanadi

Ukraina Qurolli kuchlari (UQK)ning Kursk oblastidagi harbiy operatsiyasidan asosiy maqsad Donbassdagi Rossiya armiyasi hujumini to‘xtatishga urinishdir, dedi Rossiya prezidenti Vladimir Putin 12 avgust, dushanba kuni xavfsizlik kuchlari rahbariyati bilan tezkor yig‘ilishda.

Shu bilan birga, Putinning so‘zlariga ko‘ra, Kursk oblastida sodir bo‘layotgan voqealar fonida Rossiya Qurolli kuchlarining butun front chizig‘i bo‘ylab hujum operatsiyalari sur’ati «nafaqat pasaymadi, balki aksincha, bir yarim barobar o‘sdi».

Ukraina Qurolli kuchlari hujumining boshqa maqsadlari qatorida, Rossiya prezidenti «jamiyatga nizo ekish va odamlarni qo‘rqitishga» urinishni, shuningdek, Kiyev muzokaralardagi pozitsiyasini mustahkamlash istagini ta’kidladi. 

Rossiya Ukraina Kursk viloyatidagi 28 ta aholi punktini nazorat qilayotganini tan oldi 

12 avgust holatiga ko‘ra, Rossiya Federatsiyasi hududidagi janglar va Ukraina nazorati zonasi taxminan 480 kvadrat kilometrni tashkil etadi, deya ta’kidlaydi mustaqil matbuot. Kursk oblasti gubernatori vazifasini bajaruvchi Aleksey Smirnovning so‘zlariga ko‘ra, 28 ta aholi punkti Ukraina Qurolli kuchlari nazoratida. 

Umuman olganda, gubernator vazifasini bajaruvchining so‘zlariga ko‘ra, Kursk oblasti chegara hududlarini 121 mingga yaqin aholi tark etgan. Ukraina nazoratidagi hududlarda 2000 nafar mahalliy aholining taqdiri noma’lumligicha qolyapti. Ukraina qurolli kuchlari hujumi paytida, Smirnov so‘zlariga ko‘ra, Kursk oblastining 12 tinch fuqarosi halok bo‘lgan, 121 kishi, shu jumladan 10 bola yaralangan.