BMT Bosh Assambleyasi Falastin davlatining tashkilotga to‘laqonli a’zo bo‘lish huquqini tan olish haqidagi rezolyutsiyani yoqlab ovoz berdi. Bu haqda Reuters yozdi. 

Rezolyutsiyani 143 ta davlat yoqlab chiqdi, 9 tasi (AQSh va Isroil bilan birga) qarshi chiqdi, yana 25 ta davlat betaraf qoldi.

Rezolyutsiya BMT Xavfsizlik Kengashidan Falastinning tashkilotga to‘laqonli a’zo sifatida kirishini qo‘llab-quvvatlashga chaqiradi. 

Nomzod davlat BMT to‘laqonli a’zosi bo‘lishi uchun avvalo Xavfsizlik Kengashi tegishli rezolyutsiyani ovozlarning uchdan ikki qismi bilan qabul qilishi kerak. Keyin bu qaror, shuningdek, ovozlarning uchdan ikki qismi bilan - Bosh Assambleya tomonidan qo‘llab-quvvatlanishi lozim. 

2024 yil aprel oyida BMT Xavfsizlik Kengashi Falastinning tashkilotga a’zo bo‘lishi bo‘yicha rezolyutsiyani qabul qilmadi. Shu vaqtda 12 davlat rezolyutsiyaga qarshi ovoz berdi, ikkitasi (Buyuk Britaniya va Shveytsariya) betaraf qoldi, ammo Qo‘shma Shtatlar hujjatga veto qo‘ydi. 

Bosh Assambleya tomonidan qabul qilingan hujjat Falastinga bir qator protsessual huquqlarni ham beradi – mamlakat Yaqin Sharq mavzulari bo‘yicha yig‘ilishlarda o‘zini ma’ruzachilar ro‘yxatiga kiritishi, bir guruh davlatlar nomidan tuzatishlar kiritish va protsessual takliflar kiritishi mumkin bo‘ladi. Bundan tashqari, Falastin Bosh Assambleya majlislar zalidan doimiy joy oladi.

Falastin ayni damda BMTda kuzatuvchi davlat maqomiga ega. Mamlakat bu maqomni 2012 yilda olgan.