O‘zbekiston terma jamoasi 18 yoshgacha bo‘lgan xokkeychilar o‘rtasida o‘tkazilgan Osiyo va Okeaniya chempionatida g‘alaba qozondi. 

Toshkentdagi «Humo» va Samarqand muz saroylari mezbonlik qilgan turnir finalida yosh xokkeychilar Tailand ustidan 2:1 hisobida g‘alaba qozonib, bosh sovrinni qo‘lga kiritdi. 

Bosh murabbiy Abdumajid Nosirov shogirdlari musobaqaning barcha o‘yinida g‘alaba qozondi. Jumladan, guruh bosqichida Eron 19:0, Malayziya 29:0, Kuvayt 17:0, Tailand 7:5 hisobida dog‘da qoldirildi. Yarimfinalda BAA 12:0 hisobida mag‘lub etildi. 

Uchinchi o‘rin uchun bahsda Mo‘g‘uliston xokkeychilari BAA ustidan 4:2 hisobida g‘alaba qozondi. 

Bu o‘zbekistonlik xokkeychilarning ikkinchi shunday yutug‘idir. 2023 yilda Mo‘g‘ulistonda o‘tkazilgan Osiyo va Okeaniya (U18) chempionatida ham O‘zbekiston g‘alaba qozongan edi.