Rossiya Adliya vazirligi 12 aprel, juma kuni kechqurun «chet el agentlari» deb ataluvchi reyestrga jurnalistlar Ilya Barabanov, Asya Kazanseva va Ivan Filippov, huquq himoyachisi Ivan Astashin hamda Pskov viloyatidagi Zavelichenskaya volostidan «Yabloko» partiyasi deputati Nikolay Kuzminni kiritdi. Ro‘yxatga jurnalist 2023 yil yozidayoq chet el agenti sifatida tan olingan Andrey Karaulov asos solgan «Inoagent AVK» MChJ ham kiritilgan.

«Meduza» ta’kidlashicha, yaqinda Denis Korotkov bilan hammualliflik qilgan Ilya Barabanov «Vagner» XHK haqidagi kitobini nashr etdi. Adliya vazirligining rasmiy saytidagi bayonotda aytilishicha, jurnalist urushga qarshi chiqqan, shuningdek, Rossiya Federatsiyasi hukumati tomonidan qabul qilingan qarorlar va olib borilayotgan siyosat haqida «noto‘g‘ri ma’lumot» tarqatgan. 

Rossiyada «chet el agentlari» to‘g‘risidagi qonun 

Rossiyada «chet el agentlari» to‘g‘risidagi qonun 2012 yilda paydo bo‘lgan. O‘shandan beri bir necha yuzlab tashkilotlar va shaxslar taqiq ro‘yxatiga kiritildi. Jismoniy shaxslar – «chet el agentlari» reyestri 2022 yil aprel oyi boshida ishga tushirilgan bo‘lib, u NNTlar – «chet el agentlari», OAV – «chet el agentlari» va ro‘yxatdan o‘tmagan tashkilotlar – «chet el agentlari» ro‘yxati bilan bir qatorda to‘rtinchi ro‘yxat bo‘ldi.

2022 yil dekabr oyidan boshlab qonun Rossiya rasmiylariga ko‘ra, «chet eldan yordam oladigan» va «xorijiy ta’sir ostida» bo‘lganlarni «chet el agentlari» deb e’lon qilish imkonini beradi.

Davlat dumasi avvalroq «chet el agentlari» uchun reklamani taqiqlovchi qonunni qabul qildi

2024 yil fevral oyining oxirida Davlat dumasi «chet el agentlari» uchun reklamani taqiqlovchi qonunni qabul qildi. Unga ko‘ra, tashkilotlarga Rossiya rasmiylari tomonidan «chet el agenti» deb tan olingan har qanday shaxsni reklama qilish va ularning resurslarida o‘zini reklama qilish taqiqlanadi. Taqiqni buzganlik uchun jismoniy shaxslar uchun 50 ming rublgacha va yuridik shaxslar uchun 500 ming rublgacha jarima solinadi.

11 mart kuni Rossiya prezidenti Putin Rossiya fuqarolari va kompaniyalariga «chet el agentlari» resurslarida – ularning saytlarida, ijtimoiy tarmoqlarida, bloglarida va boshqa platformalarida reklama joylashtirishni taqiqlovchi qonunni imzoladi. Hujjat, shuningdek, ommaviy axborot vositalari va internetda «chet el agentlari»ning o‘z resurslarini reklama qilishni taqiqlaydi.

2 aprel kuni «chet el agentlari»ning saylovlarda ishtirok etishini taqiqlovchi qonun loyihasi Davlat dumasiga ko‘rib chiqish uchun kiritildi.