Ukraina g‘arb hamkorlaridan o‘zining omon qolishi uchun zarur bo‘lgan qurollarni olmayapti, dedi Ukraina prezidenti Volodimir Zelenskiy 9 aprel, seshanba kuni Xarkivda Germaniyaning Bild tabloidiga, shuningdek, Axel Springer konsernining boshqa nashrlariga intervyu berib. Zelenskiyning so‘zlariga ko‘ra, «bizning sheriklarimizda omon qolishimiz uchun zarur bo‘lgan ma’lum qurollar bor. Men esa nega biz bu qurollarni ololmayotganimizni tushunmayapman».
Zelenskiy Germaniyadan TAURUS uzoq masofali qanotli raketalarni olishga umid qilishda davom etmoqda. Zelenskiy Germaniya kansleri Olaf Shols va Germaniya Bundestagining bunday yetkazib berishni rad etishini Germaniya Vladimir Putinning yadroviy tahdidlaridan qo‘rqishi bilan bog‘ladi. «Men tushunganimdek, kansler Germaniya - yadroviy davlat emasligini, TAURUS raketalari esa Germaniyadagi eng kuchli qurol tizimi ekanligini aytyapti», dedi Ukraina prezidenti.
Bundan tashqari, Zelenskiy Amerika Qo‘shma Shtatlari uzoq vaqt davomida Amerika Kongressida ma’qullanmayotgan ko‘p milliard dollarlik harbiy yordam paketini ajratishidan umidvor. Garchi Rossiya qurol-yarog‘ va harbiylar soni bo‘yicha ustunlikka ega bo‘lsa-da, «birlashgan g‘arb zamonaviy qurol tizimlariga ega», bu Ukrainaga Rossiyani mag‘lub etishga imkon beradi, dedi Zelenskiy Bild nashriga bergan intervyusida.
Tramp Ukrainaga kelishi mumkin
Yaqin kelajakda, Zelenskiyning so‘zlariga ko‘ra, noyabr oyida bo‘lib o‘tadigan prezidentlik saylovlarida qayta saylanishga umid qilayotgan AQSh sobiq prezidenti Donald Tramp Ukrainaga tashrif buyurishi mumkin. Ukraina prezidenti aytganidek, Tramp uning Ukrainaga tashrif buyurish taklifiga rozi bo‘ldi, biroq uning tashrifi aniq sanasi hali belgilanmagan.
Zelenskiy shuningdek, Ukraina urushda mag‘lubiyatga uchrasa ham, uni tark etmasligini aytdi. «Men o‘z mamlakatimni tark eta olmayman. Hech qanday holatda», - dedi u.
Bir kun oldin, United24 platformasidagi video-konferensiya vaqtida Volodimir Zelenskiy, agar AQSh Kongressi Kiyevga harbiy yordam paketini ajratishni ma’qullamasa, Ukraina Rossiyaga qarshi mudofaa urushida mag‘lubiyatga uchrashi mumkinligi haqida ogohlantirgan edi. Yangi paketning qabul qilinishiga Donald Tramp ta’sirida bo‘lgan Respublikachilar partiyasi vakillari to‘sqinlik qilmoqda.
